Bu gün Ali Məhkəmədə lisenziyası ləğv edilmiş “Royalbank” ASC-nin 4 saylı filialının keçmiş rəhbər şəxsləri Orxan Məmmədov, Pərviz Vəliyev və Ruslan Abbasovun barələrində olan məhkəmə qərarından verilən kassasiya şikayəti və kassasiya protestinə baxılıb.
FED.az xəbər verir ki, bu barədə "Report"a P.Vəliyevin vəkili Bəxtiyar Hacıyev məlumat verilib.
Onun sözlərinə görə, məhkəmənin qərarına əsasən, prokurorun kassasiya protesti təmin edilməyib. O.Məmmədovun isə kassasiya şikayəti təmin olunmayıb.
Vəkil bildirib ki, P.Vəliyevlə R.Abbasovun barəsində Cinayət Məcəlləsinin 70-ci maddəsi tətbiq olunaraq, onlara şərti cəza verilib. Hər iki şəxs azadlığa buraxılıb.
Qeyd edək ki, “Royalbank” ASC-nin 4 saylı filialının keçmiş rəhbər şəxsləri O.Məmmədov Cinayət Məcəlləsinin (CM) 179.3.2-ci (mənimsəmə və ya israf etmə, külli miqdarda törədildikdə) və P.Vəliyevlə R.Abbasov isə 308.2-ci (vəzifə səlahiyyətlərindən sui-istifadə) maddələri ilə ittiham olunub.
Ötən il iyun ayının 16-da Bakı Ağır Cinayətlər Məhkəməsinin hökmü ilə O.Məmmədov 8 il 6 ay və P.Vəliyevlə R.Abbasov isə 5 il müddətinə azadlıqdan məhrum edilib. P.Vəliyev və R.Abbasov barələrində CM-nin 70-ci (şərti məhkum etmə) maddəsi tətbiq olunaraq, həmin şəxslərə şərti cəza verilib. Hökmdən narazı qalan dövlət ittihamçısı apellyasiya protesti verib. Prokuror şərti cəzanın hökm etdiyi hissədən xaric edilməsini xahiş edib.
Bakı Apellyasiya Məhkəməində, hakim Rizvan Səfərovun sədrliyi ilə keçirilən prosesdə qərar elan olunub. Qərara əsasən, prokurorun apellyasiya protesti təmin edilib, birinci instansiya məhkəməsinin çıxardığı hökm dəyişdirilib. Belə ki, Bakı Ağır Cinayətlər Məhkəməsinin təqsirləndirilən P.Vəliyev və R.Abbasov barələrində çıxardığı şərti cəza ləğv edilib. Onlar 5 il müddətinə azadlıqdan məhrum edilib. Təqsirləndirilən P.Vəliyev və R.Abbasov məhkəmə zalında həbs edilib. O.Məmmədovun isə cəzası əvvəlki kimi (8 il 6 ay) qalıb.
Daha sonra P.Vəliyevin vəkili B.Hacıyev kassasiya şikayəti ilə Ali Məhkəməyə müraciət edib. Vəkil Bakı Apellyasiya Məhkəməsinin Cinayət Kollegiyasının ilkin məhkəmə baxışının 14 sentyabr 2016-ci il tarixli əsassız qərarının ləğv edilməsini və P.Vəliyev barəsində cinayət işinin məhkəmə istintaqının tam həcmində aparılmaqla davam etdirilməsini və onun barəsində şərti cəzanın təyin olunmasını istəyib.
Xatırladaq ki, Azərbaycan Mərkəzi Bankının İdarə Heyətinin 12 iyul 2012-ci il tarixli qərarı ilə “Royalbank” ASC-nin lisenziyası ləğv edilib.
