Bu gecə Bakının mərkəzində güclü partlayış olub.
FED.az xəbər verir ki, hadisə şəhərin mərkəzində, Səbail rayonu Tərlan Əliyarbəyov küçəsində yerləşən “Location” klubunda ("Room" klubunun qarşısında) baş verib. Hadisə nəticəsində ölən və çoxsaylı yaralananlar var. DİN və Baş Prokurorluğun məlumatına görə, 1 nəfər ölüb, 31 nəfər yaralanıb. Yaralılar təcili tibbi yardım maşınları ilə xəstəxanalara çatdırılıb
Hadisə gecə saat 3-ə yaxın baş verib. TƏBİB-dən verilən məlumata görə, obyektdə partlayış baş verməsi barədə Təcili və Təxirəsalınmaz Tibbi Yardım Stansiyasına (TTTYX) çağırış saat 02:54-də daxil olub. Dərhal hadisə yerinə Təcili və Təxirəsalınmaz Tibbi Yardım Stansiyasının 35 briqadası cəlb olunub.
TTTYX-dən verilən məlumata görə, indiyə qədər 6 yaralı 1 Saylı Şəhər Xəstəxanasına, 25 yaralı isə Yanıq mərkəzinə yerləşdirilib. Müxtəlif dərəcəli yanıq və bədən xəsarətləri alan 24 nəfər tibb müəssisələrinə (Yanıq mərkəzi, KTM, Respublika Kliniki Xəstəxanası, 3 saylı KŞX, Travmatologiya İnstitutu) hospitalizasiya ediliblər.
Xəsarət alan şəxslərin 6-sının vəziyyəti ağır, 12-sinin vəziyyəti orta ağır, 6 nəfərin isə stabil olaraq qiymətləndirilir.
TƏBİB-in İdarə Heyətinin sədri vəzifəsini icra edən Vüqar Qurbanov yaralılara baş çəkərək, onların vəziyyəti ilə maraqlanıb.
Hadisə dağıntılara səbəb olub, mülki obyektlərə və avtomobillərə ciddi ziyan dəyib. Partlayış habelə yanğınla nəticələnib. Nəticədə obyektin ətrafında park edilmiş vəziyyətdə olan 10-dan çox avtomobil zədələnib.
Bundan başqa, fotolardan yaxınlıqdakı digər kafe-restoranların da partlayışdan ziyan gördüyü məlum olur.
Hadisə yerinə hüquq-mühafizə orqanlarının, Fövqəladə Hallar Nazirliyinin əməkdaşları və təcili yardım cəlb edilib.
Hadisə yerinə Bakı şəhər icra hakimiyyətinin başçısı Eldar Əzizov və FHN-in müavini Etibar Mirzəyev gəlib.
«Azəriqaz»ın baş direktoru Ruslan Əliyev bildirib ki, hadisə propan qaz balonunun partlaması səbəbindən baş verib. Təhlükəsizlik məqsədilə ərazidə təbii qazın təchizatı dayandırılıb.
Partlayış olan klubun martın 18-də fəaliyyətə başladığı qeyd edilir.
Bakıda gecə klubunda baş verən partlayış zamanı xəsarət alanların bir qisminin adları məlum olub.
Səbail rayonu, Tərlan Əliyarbəyov küçəsində fəaliyyət göstərən gecə klubunda qeydə alınan hadisə zamanı Fətullazadə Ayxan Eldar oğlu (2001-ci il təvəllüdlü), Aslan Quliyev, Cəfərov Rauf Rüfət oğlu, Əsədzadə Rufanə Mais qızı, Məhərrəmov Ramil Ayətşah oğlu (1987-ci il təvəllüdlü), Əliyeva Sültanə İlham qızı (1987-ci il təvəllüdlü), Əbdülrəhmanlı Tural Tariel oğlu (1990-cı il təvəllüdlü), Qurbanov Kamran Nəriman oğlu (1996-cı il təvəllüdlü), Bağırova Fəridə Faiq qızı (1989-cu il təvəllüdlü), Fərqanə Eynullayeva (1999), Gülbala Abdullayev, Ələkbərova Ləman Nəcəf qızı (2001), Samira Mahmudlu (1989), Fidan Hüseynova xəsarət alıblar.
