Son günlər yüzlərlə Azərbaycan vətəndaşı görünməmiş bir hadisə ilə üzləşib - Birləşmiş Ərəb Əmirliklərinin səfirliyi öz ölkələrinin Xarici İşlər Nazirliyi və Miqrasiya Xidmətinə istinad edərək azərbaycanlılara giriş vizası verməkdən imtina edir. Üstəlik, bir çox Azərbaycan vətəndaşları qəflətən BƏƏ-nin Miqrasiya Xidmətinin qara siyahısına düşərək Əmirlik ərazisinə girişə ömürlük qadağa qoyublar.
FED.az biznes və maliyyə xəbərləri portalı “Haqqin.az”a istinadən xəbər verir ki, ötən gecə Azərbaycan vətəndaşı, iş adamı Xəyyam İlham oğlu Səfərli də Dubay hava limanında saxlanılıb. X.Səfərli həbsindən bir neçə dəqiqə əvvəl İnstaqram səhifəsində yazı buraxmağa müvəffəq olub.
H.Səfərli heç bir səbəb olmadan saxlanılıb, onun iş vizası ləğv edilib. Məlumata görə, BƏƏ-də işləyən digər Azərbaycan vətəndaşlarına qarşı da analoji tədbirlər görülür. Azərbaycanın BƏƏ-dəki səfirliyindən Azeri Daily-yə verilən məlumata görə, H.Səfərli ilə bağlı baş vermiş insidentlə bağlı ölkəmizin diplomatik missiyası Əmirliyin Xarici İşlər Nazirliyinə müvafiq nota göndərib.
Azərbaycanın bir çox turizm şirkətlərinin rəhbərləri mövcud vəziyyəti narahatlıqla izləyir, iki ölkə arasında münasibətlərdə ilk dəfədir ki, belə viza böhranı ilə üzləşdiklərini vurğulayırlar. “Adətən səfirlik vizaları bir neçə saat ərzində verirdi. İndi də bütün vətəndaşlarımızın adları qara siyahıya salınıb. Biz nə baş verdiyini başa düşmürük”, - Azərbaycanın turizm sənayesinin liderlərindən biri Azeri Daily-yə bildirib.
