Azərbaycanın hakim Yeni Azərbaycan Partiyası (YAP) 2020-ci ili 1 milyon 763 min manat mənfəətlə başa vurub.
Eləcə də bax: Azərbaycanda ən böyük zərər və mənfəətlə işləyən – DÖVLƏT ŞİRKƏTLƏRİ – SİYAHI
FED.az xəbər verir ki, partiyanın maliyyə hesabatına görə, bu, 2019-cu ilə nisbətən 23,5% azdır.
Ötən il YAP-ın gəlirləri 12 milyon 290 min manat (illik müqayisədə 15,2% çox), o cümlədən üzvlük haqlarından gəlirləri 10 milyon 346 min manat (11,1% çox), dövlət büdcəsindən ayrılmış vəsait hesabına gəlirləri 1 milyon 942 min manat (42,9% çox), digər (faiz) gəlirləri isə 2 min manat (əvvəlki il olmayıb) təşkil edib. Hesabat dövründə Partiyanın xərcləri isə 10 milyon 527 min manat (25,9% çox), o cümlədən cari xərcləri 2 milyon 318 min manat (75,2% çox), saxlanma və informasiya təminatı xərcləri 7 milyon 287 min manat (30,55% çox), ictimaiyyətlə əlaqələr və parlament seçkiləri üzrə xərcləri 348 min manat (60,8% az), kredit faizləri üzrə xərcləri 7 min manat (73% az), sair xərcləri isə 568 min manat (3,8% çox) olub.
Bu il yanvarın 1-nə YAP-ın aktivləri 27 milyon 117 min manat təşkil edib ki, bu da illik müqayisədə 6,7% çoxdur. Hesabat dövründə Partiyanın öhdəlikləri 68,6% azalaraq 32 min manata düşüb, balans kapitalı isə 7% artaraq 27,085 milyon manata çatıb.
Xatırladaq ki, YAP-ı 1992-ci ildə sabiq prezident Heydər Əliyev yaradıb. Onun ehtiyat fondu 11 milyon 550 min manatdır. 1993-cü ildən hakimiyyətdə olan Partiya təxminən 760 min üzvü olduğunu bəyan edir. (Renkinq)
