Azərbaycan Sahibkarlar Konfederasiyası ilə Dövlət Gömrük Komitəsi arasında Əməkdaşlıq Şurasının növbəti iclası keçirilib.
FED.az xəbər verir ki, iclasda gömrük sahəsində aparılan islahatlar müzakirə edilib, sahibkarları narahat edən məsələlərə toxunulub və hər bir məsələ ilə bağlı konkret tapşırıqlar verilib.
Eləcə də bax: AQTA qida sahəsində çalışan sahibkarlara - MÜRACİƏT ETDİ
ASK Rəyasət Heyətinin üzvü, "Mətanət-A” şirkətinin rəhbəri Elxan Bəşirov hava nəqliyyatı ilə gətirilən malların "0” gömrük rüsumuna düşdüyü halda belə Beynəlxalq Hava Limanında müvafiq laborator imkanların olmadığı üçün sahibkarın ekspertizaya vaxt itirməmək xatirinə 5-15 faiz həcmində gömrük rüsumu ödəyib malı keçirdiyini bildirib.
Gömrük Tariflərinin Tənzimlənməsi və Ödənişlər Baş İdarəsinin rəisi Mirqasım Vahabov laboratoriyanın hava limanında da qurulmasının texniki baza sarıdan çətin olduğunu deyərək, "0” gömrük rüsumuna düşən mal üzrə sahibkarları rüsum ödəməməyə, bu məsələdə israrlı olmağa dəvət edib: "Sahibkar bir dəfə həmin mal üzrə ekspertiza rəyini alsın, həmin məhsulu təkrar gətirəndə artıq onun əlində müvafiq rəyi olacaq və sənədi göstərib heç bir rüsum ödəməsin. Biz sizin yanınızdayıq, hər cür dəstək verməyə hazırıq, prosesi birlikdə izləyək və harada nöqsan varsa, düzəldək”.
"EYNİ MAL HƏR DƏFƏ EKSPERTİZAYA GÖNDƏRİLİR"
ASK-ın Nəqliyyat və logistika məsələləri ilə iş komissiyasının sədri Kamran Həbibov Azərbaycana gətirilən bütün malların gömrük ekspertizasına göndərilməsinə diqqət çəkib. Onun sözlərinə görə, bu laboratoriyanın həddən artıq yüklənməsi analizlərə çəkilən büdcə xərclərinin artması, sahibkarın isə yükünün sərhəddə ləngiməsi və hər gün üçün yüksək xərclər yaratması ilə nəticələnir. Bu prosesin sadələşdirilməsini təklif edən K.Həbibov sahibkarın müntəzəm olaraq gətirdiyi eyni malı hər dəfə ekspertizaya göndərməməyi xahiş etdi.
İ.Hüseynov qaldırılan problemə münasibətini "aktual məsələdir” deyə ifadə edərək, təkrar ekspertizaya göndərilmə hallarının monitorinqini aparmaq məqsədilə Gömrük Nəzarətinin Təşkili və Ticarətin Asanlaşdırılması Baş İdarəsinin rəis müavini Rauf Məmmədovla birlikdə prosedurların monitorinqinin keçirilməsi haqqında yerindəcə göstəriş verib.
Texnoloji İnnovasiyalar və Statistika Baş İdarəsinin rəisi Təmkin Xəlilov gömrük prosedurlarının asanlaşdırılması ilə bağlı komitə sədrinin sərəncam imzaladığını və artıq hava nəqliyyatındakı gömrük postlarında belə əlavə pəncərələr yaradıldığını vurğuladı: "Gömrük inspektoru sistemdən həmin məhsulun 2 ay əvvəl ekspertizaya verildiyini görəcək və bu halda təkrar ekspertizaya göndərə bilməz. Buna sistem özü də yol verməyəcək” deyə məsələyə aydınlıq gətirib.
