İqtisadi İslahatların Təhlili və Kommunikasiya Mərkəzi (İİTKM) “İxrac icmalı”nın növbəti sayını təqdim edib.
FED.az biznes və maliyyə xəbərləri portalı xəbər verir ki, Azərbaycanın əsas ticarət tərəfdaşlarına qeyri-neft ixracında fərqli dinamika qeydə alınıb.
Məlumata görə, bu ilin yanvar ayında Azərbaycanın İsveçrəyə qeyri-neft ixracı 38,6 milyon ABŞ dolları təşkil edib. Bu, ötən ilin eyni dövrü ilə müqayisədə 16,4 milyon ABŞ dolları və ya 73,9 faiz çoxdur. Qeyd edək ki, ötən ilin yanvar ayında İsveçrəyə ixrac 22,2 milyon ABŞ dolları olmuşdu.
Eyni dövrdə Gürcüstana qeyri-neft ixracı 31,6 milyon ABŞ dollarına çatıb. Bu göstərici illik müqayisədə 5,1 milyon ABŞ dolları və ya 19,2 faiz artım deməkdir. Ötən ilin yanvarında Gürcüstana 26,5 milyon ABŞ dolları dəyərində məhsul ixrac edilmişdi.
Bununla yanaşı, bəzi əsas bazarlarda azalma qeydə alınıb. Yanvar ayında Rusiyaya qeyri-neft ixracı 77 milyon ABŞ dolları olub ki, bu da illik müqayisədə 4 milyon ABŞ dolları və ya 4,9 faiz azalma deməkdir. Ötən ilin eyni ayında bu göstərici 81 milyon ABŞ dolları idi.
Türkiyəyə ixrac 31,5 milyon ABŞ dolları təşkil edib və ötən ilin yanvar ayı ilə müqayisədə 5,6 milyon ABŞ dolları və ya 15,1 faiz azalıb (2024-cü ilin yanvarı – 37,1 milyon ABŞ dolları).
Ukraynaya qeyri-neft ixracı isə daha kəskin geriləyərək 15,2 milyon ABŞ dolları olub. Bu, illik müqayisədə 6,6 milyon ABŞ dolları və ya 30,3 faiz azalma deməkdir. Ötən ilin yanvar ayında Ukraynaya ixrac 21,8 milyon ABŞ dolları təşkil etmişdi.
Beləliklə, hesabat dövründə İsveçrə və Gürcüstan istiqamətində artım, Rusiya, Türkiyə və Ukrayna bazarlarında isə azalma müşahidə olunub.
