30 May 2019-cu ildə Azərbaycan Türkiyə İş Adamları Birliyinin (ATİB) ofisində təşkilatın İllik Maliyyə Hesabatının növbəti iclası keçirilib.
ATİB-dən FED.az-a verilən xəbərə görə, iclası giriş nitqi ilə ATİB Baş Katibi Pərvanə Hacıyeva açıq elan edib.
Daha sonra Prosedura uyğun olaraq iştirakçılar tərəfindən iclasın sədri və katiblər seçilib.
Eləcə də bax: Azərbaycanda yeni startap var – YÜKSƏK GƏLİR GƏTİRƏCƏK
İclasın sədri ATİB İdarə Heyətinin sədr müavini Avni Demirci, 1-ci katib ATİB PR Manager Gülnar Şirinova, 2-ci katib ATİB üzvü olan “Zenit Tour” Şirkətinin direktoru seçilib.
Türkiyə Respublikasının Azərbaycandakı səfiri, Cənab Erkan Özoral qonaqları salamlayaraq ATİB-in fəaliyyətində uğurlar arzulayıb.
Gündəliyə uyğun olaraq ATİB İdarə Heyətinin sədri Cemal Yangın İdarə Heyətinin 2018-ci il üzrə fəaliyyət hesabatını təqdim edib.
Daha sonra Təftiş komissiyasının sədri, ATİB üzvü olan “PricewaterhouseCoopers” (PWC) şirkətindən Könül Quliyeva 2018-ci il üzrə maliyyə hesabatları barədə komissiyanın rəyini təqdim edib.
Bundan sonra İdarə Heyətinə yeni üzvlərin seçilməsi məsələsinə baxılıb. İşlərinin çoxluğu səbəbindən İdarə Heyətinin üzvü Kəmaləddin Mənsimov və Oktay Vayiç İdarə Heyəti üzvlüyündən azad edilmələrini xahiş ediblər. Onların yerinə “Anadolu Vizyonu Kurs Destek Ve Turizm Sanayi Ticaret Anonim Şirketi”- nin Azərbaycan Respublikasındakı Nümayəndəliyi Azər Hətəmov və “Ericson” şirkətinin Azərbaycan üzrə təmsilçisi Arda Çetiner ATİB İdarə Heyətinə üzv seçiliblər.
Daha sonra Maliyyə Təftiş Komissiyasına üzv seçilib. “LB Audit Konslatinq” xidmətinin rəhbəri Lamiyə Bayramova sədr, Qorxmaz Ağayev və Fatih Güven üzv seçiliblər.
ATİB Sədrinin müavini Mürsəl Rüstəmov 2019-cu il üçün büdcəsi təqdim edib və sənədlər iclas iştirakçıları tərəfindən təsdiqlənib.
