Azərbaycan Dövlət Reklam Agentliyi (ADRA) 2020-ci ildə bir sıra yeniliklər tətbiq edəcək.
Eləcə də bax: Dövlət Reklam Agentliyi sistem alınması üçün - 1 MİLYON MANATA YAXIN PUL XƏRCLƏYİB
FED.az xəbər verir ki, ADRA-nın İctimaiyyətlə əlaqələr şöbəsindən bildirilib ki, “İcazələr” proqram təminatı yenilənəcək. Açıq məkandakı reklam daşıyıcıları və reklamların qeydiyyatının optimallaşdırılması məqsədilə agentliyin istifadə etdiyi “İcazələr” proqram təminatını Elektron Hökumətin İnkişafı Mərkəzi tam yeniləyıb. Hazırda proqram təminatı agentliyin Mərkəzi Aparatında test rejimində istifadə olunur və tezliklə regional idarələrdə də tətbiq olunacaq. Növbəti mərhələdə isə xidmət my.gov.az portalına inteqrasiya olunacaq. Bu isə o deməkdir ki, müvafiq əməliyyatları (sistemdə qeydiyyat, icazə üçün müraciətin göndərilməsi, icazə üçün tələb olunan məlumatların daxil edilməsi, ödənişin aparılması) sahibkar özü asanlıqla həyata keçirə biləcək.
Bununla yanaşı, reklam daşıyıcıları istehsalının təkmilləşdirilməsi istiqamətində müvafiq addımlar atılacaq. Agentliyin tabeliyində fəaliyyət göstərən istehsal müəssisəsi yeni nəsil reklam qurğularının keçən ildən başlanan istehsal prosesini daha da inkişaf etdirəcək. ADRA-nın təşəbbüsü ilə Bakıda əldə olunan razılığa əsasən Çinin Shenzhen GCL Electronics şirkəti müəssisəni LED panelləri ilə təmin edəcəkdir. Bu da hər bir LED tipli reklam qurğusunun yerli istehsal xərcini ölkəyə idxal xərcindən daha ucuz edəcəkdir. Ölkədə LED tipli reklam qurğularının sayının artması reklam operatorlarının da gəlirlərini artıracaq, reklam bazarının genişlənməsi üçün stimul yaradacaq.
Reklamvericilər üçün daşıyıcıların müasirliyi ilə yanaşı reklamın effektivliyi barədə də məlumat almaq da önəmlidir. Bu məqsədlə, mümkün ərazilərdə reklamların effektivliyinin ölçülməsi və nəticələr barədə sahibkarların məlumatlandırılması da qarşıya qoyulan hədəflərdəndir. Effektivlik indeksi beynəlxalq səviyyədə əsasən müəyyən vaxt ərzində reklam daşıyıcısı yaxınlığından keçən avtomobil və piyadaların sayı, həmçinin reklamın görünməsi imkanını əks etdirir. Bu məlumatların yığılması və emal olunması müşahidə kameraları, həmçinin onlara aid xüsusi proqram təminatı vasitəsilə mümkün olacaq.
Azərtac
