2025-ci ilin avqustun 1-i vəziyyətinə olan məlumata əsasən, Azərbaycanın bank sektorunda filialların, ATM-lərin və işçilərin sayında artım qeydə alınıb, şöbələrin sayında isə azalma davam edib.
FED.az bu barədə Mərkəzi Bankın açıqladığı aylıq statistik bülletenə istinadən xəbər verir
Son bir ayda ölkədə bank filiallarının sayı 2 vahid (0.4%) artaraq 498-ə çatıb. Ötən ilin sonu ilə müqayisədə filialların sayı 13 vahid (2.7%) artıb. İllik müqayisədə isə bank filiallarının sayı 11 vahid (2.3%) çoxalıb.
Bank şöbələrinin sayı son bir ayda dəyişməyərək 86 olaraq qalıb. Lakin ötən ilin sonu ilə müqayisədə şöbələrin sayı 2 vahid (2.3%) azalıb. İllik müqayisədə isə daha kəskin azalma müşahidə olunur: bank şöbələrinin sayı 6 vahid (6.5%) azalıb.
Bankların ATM şəbəkəsi genişlənməkdə davam edir. Son bir ayda ATM-lərin sayı 2 vahid (0.1%) artaraq 3357-yə çatıb. Ötən ilin sonundan bu yana ATM-lərin sayı 127 vahid (3.9%) artıb. İllik müqayisədə isə 251 vahidlik (8.1%) artım qeydə alınıb.
Bank sektorunda çalışan işçilərin sayında da ciddi artım var. Son bir ayda bank işçilərinin sayı 56 nəfər (0.2%) artaraq 26,127 nəfərə çatıb. Ötən ilin sonu ilə müqayisədə işçi sayı 764 nəfər (3.0%) çoxalıb. İllik müqayisədə isə bank işçilərinin sayı 1805 nəfər (7.4%) artıb.
Xatırladaq ki, 2025-ci ilin iyunun 30-na olan vəziyyətə görə, bankların filiallarının sayı 496, şöbələrinin sayı 86, ATM-lərinin sayı 3355, bank işçilərinin sayı isə 26,071 nəfər təşkil edib.
2024-cü ilin sonunda bu göstəricilər müvafiq olaraq 485 filial, 88 şöbə, 3 230 ATM və 25 min 363 işçi olub.
Ötən ilin eyni dövründə (31 iyul 2024) isə ölkədə 487 bank filialı, 92 şöbə, 3 min 106 ATM və 24 min 322 bank işçisi fəaliyyət göstərirdi.
