Azərbaycanda fəaliyyət göstərən 26 bank ötən ili 609 milyon manat xalis mənfəətlə başa vurub ki, bu da onların bu il yanvarın 1-nə malik olduqları 4 611,838 milyon manat məbləğində nizamnamə kapitalının 13,2%-i qədərdir.

Eləcə də bax: Aktivlərindən ən yaxşı istifadə edən banklar - SİYAHI-CƏDVƏL

FED.az xəbər verir ki, ayrı banklarda isə sözügedən nisbət fərqlidir. Belə ki, 2021-ci ildən mənfəətlə çıxmış 23 bank arasında nizamnamə kapitalından ən yaxşı istifadə edəni "Kapital Bank" ASC olub. Bu bankın əldə etdiyi mənfəət kapitalının 73,2%-ni təşkil edib. Baxmayaraq ki, "Kapital Bank" kapitalının məbləğinə görə ölkədə 7-cidir.

Fəaliyyət effektivliyinə görə, 2-ci yeri isə “Bank of Baku” ASC tutub. Bu bank ötən il nizamnamə kapitalının 43,6%-i qədər mənfəət əldə edib. Bu arada, "Bank of Baku" kapitalının məbləğinə görə, 26 bank arasında 22-ci yerdə qərarlaşıb.

3-cü yerə isə “Bank Respublika" ASC sahib çıxıb. Bu bankın illik mənfəəti nizamnamə kapitalının 26,6%-i qədər olub. Halbuki, "Bank Respublika" kapitalının məbləğinə görə, banklar arasında 16-cıdır.

Mənfəətlə işləyən qalan 20 bankdan isə 4-də sözügedən göstərici 13-26% arasında, 12 bankda 1-8% arasında, 4 bankda isə 0-1% arasında dəyişir. 

(Renkinq)