Bu gün Azərbaycan Banklar Assosiasiyasının (ABA) yaradılmasından 33 il ötür.
“Bankçılıq Mükafatları- 2022” hansı banklara verildi? – BANKLAR, SİYAHI
FED.az xəbər verir ki, hazırda ABA-nın 25 bank və 5 qeyri-bank təşkilatı olmaqla 30 üzvü var.
ABA üzv təşkilatların birgə korporativ maraqlarını təmsil edən, onları zəruri və faydalı məlumat və xidmətlərlə təmin edən, bank sektorunun inkişafına xidmət edən, təcrübə, ideya və təşəbbüslərin müzakirə edildiyi platformadır.
ABA-nın tərkibində “Azərbaycan Bank Tədris Mərkəzi”, bundan əlavə “Banklar və Biznes qəzeti”, “Milli Qəhrəman Mübariz İbrahimovun adını daşıyan Biləsuvar bağça-lisey-məktəb kompleksi” kimi törəmə qurumları, “Bank Ombudsmanı” və “Münsiflər Məhkəməsi” fəaliyyət göstərir.
Eyni zamanda, bank sektorunun qarşısındakı imkanlar və çağırışları müzakirə edən, ideya və təkliflər verən, bankların rəhbər nümayəndələrindən ibarət 14 Ekspert Qrupu da ABA-nın strukturuna daxildir.
ABA çoxsaylı xarici bank assosiasiyaları, beynəlxalq və regional bank birlikləri ilə yaxından əməkdaşlıq edir.
Fəaliyyət göstərdiyi müddətdə ABA Azərbaycan Respublikasının Mərkəzi Bankı, qanunverici, icraedici və məhkəmə orqanları, ictimai təşkilatlar və beynəlxalq qurumlarla sıx əməkdaşlıq əlaqələri yaratmış və bununla da qanunvericiliyin təkmilləşdirilməsi, bank infrastrukturunun formalaşması, ölkədə həyata keçirilən iqtisadi islahatların bank sektoru tərəfindən dəstəklənməsi, bankların beynəlxalq əlaqələrinin qurulması, ümumilikdə bank-maliyyə sektorunun inkişafı üzrə əhəmiyyətli işlər görməkdədir.
ABA eyni zamanda çoxsaylı beynəlxalq əhəmiyyətli tədbirlərin təşkilatçılığı və ev sahibliyini həyata keçirir. Bunlara hər il Bakıda keçirilən Maliyyə və Texnologiyalar Sammiti (FİNTEX SUMMİT) və Beynəlxalq Bankçılıq Forumunu qeyd etmək olar.
Qarşımızda duran prioritet hədəflərimiz ölkədə maliyyə savadlılığının artırılması, maliyyə xidmətlərinə əlçatanlığın genişləndirilməsi və sektorda rəqəmsallaşmanın inkişafı, vətəndaşlarımıza müasir və etibarlı bank-maliyyə xidmətlərinin təqdim edilməsi, müştəri məmnunluğunun maksimum təmin edilməsi, eləcə də işğaldan azad edilmiş torpaqlarımızda müasir bank-maliyyə infrastrukturunun qurulması, həyata keçiriləcək “Azərbaycan Respublikasının işğaldan azad edilmiş ərazilərinə Böyük Qayıdışa dair I Dövlət Proqramı”nın icrasına, yeni bizneslərin maliyyələşməsinə dəstək göstərmək istiqamətində görülən işlərdə yaxından iştirak etməkdir.
Dəyərli üzvlərimizi, onların rəhbərlərini, əməkdaşlarını, ekspert qruplarımızın üzvlərini ABA-nın yaranması münasibətilə təbrik edir və birlikdə olduğumuza görə hər birinə təşəkkür edirik!
