2025-ci ilin dekabrın 1-nə Azərbaycanda fəaliyyət göstərən bankların faiz xərcləri 1 milyard 676,2 milyon manat təşkil edib.

• Azərbaycan banklarının faiz gəlirləri - 4,5 MİLYARD MANATI ÖTÜB

FED.az bu barədə Azərbaycan Mərkəzi Bankına istinadən xəbər verir.

Bankların faiz xərcləri ötən ilin eyni dövrü ilə müqayisədə 585 milyon manat, yəni 53,6% artıb. Aylıq müqayisədə isə artım 168,3 milyon manat, yəni 11,1% yüksəlib.

Xatırladaq ki, bankların faiz xərcləri bu ilin noyabrın 1-nə 1 milyard 507,9 milyon manat, 2024-cü ilin dekabrın 1-nə isə 1 milyard 91,2 milyon manat təşkil edib.

Bankların ən böyük xərc maddəsi olan depozitlər üzrə ödədikləri faizlər 1 milyard 164,2 milyon manat təşkil edib. Bu, illik müqayisədə 350,8 milyon manat (43,1%) artım deməkdir. Son bir ayda isə bu xərclər 111,4 milyon manat (10,6%) artıb.

Depozit xərclərinin əsas hissəsi müddətli depozitlərin payına düşüb. Banklar müddətli depozitlərə 918,9 milyon manat faiz ödəyiblər. Bu rəqəm ötən ilin eyni dövrü ilə müqayisədə 215,5 milyon manat (30,6%) çoxdur.

Bankların maliyyə sektorundan cəlb etdiyi vəsaitlərə görə faiz xərcləri 272,6 milyon manat olub. Bu, illik müqayisədə 96,5 milyon manat (54,8%), son bir aya görə isə 29,7 milyon manat (12,2%) artım deməkdir.