Bank xidmətlərindən istifadə edərkən müqavilə şərtləri ilə tanış olmaq, hüquq və öhdəlikləri bilmək, eləcə də hər hansı narazılıq yarandıqda düzgün müraciət qaydasına əməl etmək istehlakçıların hüquqlarının qorunması baxımından mühüm əhəmiyyət daşıyır.
FED.az xəbər verir ki, müqavilə bağlayarkən şərtlərlə diqqətlə tanış olmaq vacibdir:
Bankla müqavilə bağlamazdan əvvəl müştərilərə təqdim olunan sənədləri, xüsusilə standart məlumatlandırma formasını diqqətlə oxumaq tövsiyə olunur. Bu forma bank məhsulu və ya xidməti barədə əsas məlumatları, ödəniş üsullarını, maliyyə institutunun fəaliyyətinə nəzarəti həyata keçirən orqan haqqında məlumatları, həmçinin istehlakçı hüquqlarının pozulmasına səbəb olan halların aradan qaldırılması ilə bağlı şərtləri əhatə edir.
Müqavilənin şərtləri ilə əvvəlcədən tanış olmaq müştərinin üzərinə düşən öhdəlikləri, ödəniş qaydalarını və mümkün riskləri daha aydın başa düşməsinə, eləcə də məlumatlı qərar verməsinə kömək edir. Anlaşılmayan məqamlar olduqda müqavilə imzalanmazdan əvvəl bankdan ətraflı izahat almaq məqsədəuyğundur.
Şikayət yarandıqda ilk növbədə banka müraciət etmək tövsiyə olunur
Bank xidməti ilə bağlı narazılıq yarandıqda istehlakçının ilk addımı müvafiq maliyyə institutuna müraciət etmək olmalıdır. Azərbaycan Respublikası Mərkəzi Bankının maliyyə institutlarında istehlakçı şikayətlərinə baxılması ilə bağlı metodoloji yanaşmasına əsasən, ilk növbədə maliyyə institutuna müraciət edilməsi tövsiyə olunur.
Müraciətdə problemin mahiyyətinin, hadisənin baş verdiyi tarixin və istehlakçının gözləntisinin aydın göstərilməsi, mövcud olduqda müvafiq sənədlərin əlavə edilməsi araşdırma prosesinə kömək edə bilər.
Mərkəzi Banka müraciət imkanları
Maliyyə institutu ilə yaranmış məsələnin həlli mümkün olmadıqda və ya şikayətinin nəticəsi ilə razılaşmadıqda, istehlakçı Azərbaycan Respublikası Mərkəzi Bankına müraciət edə bilər. Bunun üçün Mərkəzi Bankın rəsmi müraciət kanallarından, o cümlədən qaynar xəttindən və əlaqə nömrələrindən, rəsmi internet səhifəsinin müraciət bölməsindən, vətəndaş qəbulundan, poçt vasitəsilə yazılı müraciət imkanından və digər təqdim olunan rəsmi kanallardan istifadə etmək mümkündür.
Məhkəməyə müraciət
Maliyyə xidmətləri ilə bağlı mübahisələrin məhkəmə qaydasında həlli zamanı qanunvericiliklə müəyyən edilmiş prosessual tələblərə əməl olunmalıdır. Mübahisənin növündən asılı olaraq, məhkəməyə müraciət etməzdən əvvəl məhkəməyədək həll proseduruna riayət edilməsi, bəzi hallarda isə ilkin mediasiya sessiyasında iştirak tələb oluna bilər. Kommersiya mübahisələrində qanunvericiliklə nəzərdə tutulmuş hallarda qarşı tərəfə pretenziya məktubunun göndərilməsi də tələb olunur.
Növbəti mərhələdə iddia ərizəsi hazırlanmalı, tələblər və onların hüquqi əsasları göstərilməli, ərizəyə zəruri sənədlər əlavə edilməlidir. Sənədlər qanunvericiliyin tələblərinə uyğun olaraq məhkəməyə, o cümlədən elektron məhkəmə sistemi vasitəsilə təqdim edilə bilər.
Məhkəməyə müraciət etməzdən əvvəl konkret mübahisəyə tətbiq olunan prosedur qaydalarını dəqiqləşdirmək və zərurət olduqda hüquqi məsləhət almaq tövsiyə olunur.
İstehlakçı hüquqlarının qorunması məlumatlı qərarlardan başlayır. Müqavilə şərtlərini əvvəlcədən öyrənmək, yaranan problemlərlə bağlı aidiyyəti qurumlara düzgün qaydada müraciət etmək və qanunvericiliyin tələblərinə əməl etmək maliyyə xidmətlərindən daha təhlükəsiz və məsuliyyətli istifadəyə imkan verir.
