Azərbaycan Mərkəzi Bankı 2023-cü ilin 8 ayı üzrə (yanvar-sentyabr) bank sektoru üzrə göstəriciləri açıqlayıb.
Azərbaycanda bankların xalis mənfəəti - 23% ARTIB
FED.az Mərkəzi Banka istinadən xəbər verir ki, 31 avqust 2023-cü il tarixinə fəaliyyətdə olan bankların cəmi aktivləri 45 milyard 358.7 milyon manat, cəmi öhdəlikləri 39 milyard 474.1 milyon manat, balans kapitalı 5 milyard 884.6 milon manat olmuşdur. Avqust ayında bankların cəmi aktivləri, сəmi öhdəlikləri və balans kapitalı müvafiq olaraq 1.1%, 1.1% və 0.8% artmışdır.
Avqust ayında bankların kredit portfeli 2.1% və ya 442.2 milyon manat artaraq 21 milyard 814.2 milyon manat olmuşdur. Kredit portfelinin strukturu: ı) biznes kreditləri – 54.2% (11 milyard 821.8 milyon manat); ıı) istehlak kreditləri – 29.9% (6 milyard 532.5 milyon manat) və ııı) ipoteka kreditləri – 15.9% (3 milyard 459.9 milyon manat). Ay ərzində biznes kreditləri mütləq ifadədə 199.1 milyon manat, istehlak kreditləri 156.5 milyon manat, ipoteka kreditləri isə 86.6 milyon manat artmışdır.
Cəmi kredit portfelində (BOKT-lər və kredit ittifaqları daxil olmaqla) vaxtı keçmiş kreditlərin payı əvvəlki ilin müvafiq dövrünə nəzərən 1 faiz bəndi azalaraq 2.4% təşkil etmişdir.
Öhdəliklərin strukturunda depozit portfeli üstünlük təşkil edir – cəmi öhdəliklərin 81.1%-i və ya 31 milyard 998.7 milyon manat. Depozit portfelinin 61.6%-i (19 milyard 722.7 milyon manat) hüquqi şəxslərin, 38.4%-i (12 milyard 276 milyon manat) fiziki şəxslərin depozitlərindən (fərdi sahibkarlıqla məşğul olan fiziki şəxslərin depozitləri istisna olmaqla) ibarətdir.
Fiziki şəxslərin əmanət portfelinin 54.5%-i (6 milyard 691.5 milyon manat) müddətli əmanətlərdən ibarətdir. Hüquqi şəxslərin tələbli depozitləri 15 milyard 939.6 milyon manat olmaqla, hüquqi şəxslərin cəmi depozit portfelinin 80.8%-ni təşkil etmişdir.
Fiziki şəxslərin əmanətlərinin dollarlaşması avqust ayında ilin əvvəlinə nəzərən 2.9 faiz bəndi, əvvəlki ilin müvafiq dövrünə nəzərən isə 3.4 faiz bəndi azalaraq 36.3% təşkil etmişdir.
2023-cü ilin yanvar- avqust aylarında banklar 724,2 milyon manat xalis mənfəət, 1 milyard 64 milyon manat məbləğində əməliyyat mənfəəti əldə etmişlər. Ötən ilin müvafiq dövrü ilə müqayisədə bankların xalis və əməliyyat mənfəəti müvafiq olaraq 23% və 25% artmışdır.
2023-cü ilin 8 ayında banklar tərəfindən 187,4 milyon manat məbləğində mənfəət vergisi ödənilmişdir ki, bu da ötən ilin müvafiq dövrü ilə müqayisədə 38% və ya 51,7 milyon manat daha çoxdur.
31 avqust 2023-cü il tarixinə fəaliyyət göstərən 24 bankın filiallarının sayı 488, şöbələrinin sayı 89, ATM-lərin sayı 3,032 olmuşdur. Hesabat ayında bank sektorunda çalışanların sayı 0.7% və ya 172 nəfər artaraq 23,491 nəfər təşkil etmişdir. Ümumilikdə, son 1 ildə bank sektorunda çalışanların sayı 7% və ya 1,544 nəfər artmışdır.
