Məlum olduğu kimi, Ukrayna-Rusiya münaqişəsindən sonra tətbiq edilən sanksiyalar səbəbindən Rusiya ilə Azərbaycan arasında sürətli pul köçürmələrində məhdudiyyətlər yaranıb. Bəzi pul köçürmə sistemlərinin rublla köçürmələri dayandırması Azərbaycan banklarının bu istiqamətdə fəaliyyətinə mənfi təsir edib.

Eləcə də bax: Mətbuat xidməti: "Zolotaya Korona" Azərbaycanda adi rejimdə - İŞLƏYİR

FED.az xəbər verir ki, son bir ayda Azərbaycanda fəaliyyət göstərən 26 bankdan 11-i rublla, 7 bank isə dollarla köçürmələri dayandırıb. 3 bank (“Muğanbank”, “Accessbank” və "Yapi Kredi Bank Azərbaycan”) vasitəsilə Rusiyadan sürətli pul köçürmələri tamamilə dondurulub.

Ölkədə 9 bank Rusiyadan dollar köçürmələrini, 7 bank isə rubl köçürmələrini manata konvertasiya olunmaqla müştərilərinə təqdim edir. “Bank Respublika” 3500 dollardan, “Bank Avrasiya” isə 2000 dollardan yuxarı köçürmələri manata konvertasiya edir.

“Bank BTB”, "Yelo Bank" və “Expressbank”dan isə bildirilib ki, dollarla köçürmələr kassadakı məbləğdən aslı olaraq dollar və ya manata konvertasiya olunmaqla təqdim edilir.

Ziraat Bank Azərbaycanda  Rusiyaya Rubl, Euro və Dollar köçürmələri və eyni şəkildə vəsaitlərin qəbulu, yalnız vəsaiti göndərən və qəbul edən şəxsə və ya vəsaitin göndərildiyi banka qarşı sanksiya tətbiq edilmədiyi təqdirdə mümkündür.

“Azər Türk Bank”dan isə bildirilib ki, sürətli pul köçürmələri yalnız Şirvan və Naxçıvan filialları üzrə aparılır. Bank Rusiyadan həm dollar, həm rubl üzrə pul köçürmələrini qəbul edir, amma Azərbaycandan Rusiyaya dollar üzrə köçürmələr dayandırılıb. (Apa)