Dövlət bankı «Azər Türk Bank» 2022-ci ili uğurlu nəticələrlə başa vurub.
Azər Türk Bank ötən ili - UĞURLA BAŞA VURDU
FED.az bankın hesabatlarına istinadən xəbər verir ki, 2022-ci ildə bank 2 dəfədən çox böyüyüb – aktialəri 2,4 dəfə artıb. Eyni zamanda bankın gəlirləri və mənfəətində ciddi artım baş verib.
Hesabata əsasən ötən il «Azər Türk Bank»ın aktivləri 2,4 dəfə və ya 558 milyon manat artaraq ilin əvvəlindəki 407 milyon manatdan 965 milyon manata yüksəlib.
Bu dövrdə «Azər Türk Bank» kreditini təqribən 100 milyon manat artıraraq 233,6 milyon manatdan 321,7 milyon manata yüksəldib (42% artım). Bankın istehlak kreditləri 66 milyon manat və ya 85% artaraq 143,5 milyon manata yüksəlib. Daşınmaz əmlak kreditləri 33 milyon manat və ya 30% artaraq 143 milyon manata çatıb, biznes kreditləri isə 10 milyon manat azalaraq 35 milyon manat olub.
Banrkda nağd vəsaitlər təqribən 3 dəfə artaraq 100,2 milyon manatdan 287,7 milyon manata yüksəlib.
2022-ci ildə «Azər Türk Bank» qiymətli kağızlara yatırımlarını kəskin şəkildə – 2,5 dəfə artıraraq 47,7 milyon manatdan 121 milyon manata yüksəldib.
«Azər Türk Bank»ın başqa banklarda saxladığı depozitləri isə 67 dəfə artaraq 3 milyon manatdan 201 milyon manata yüksəlib.
2022-ci ilin yekununda «Azər Türk Bank»ın öhdəlikləri 2,56 dəfə və ya 546 milyon manat artaraq 350 milyon manatdan 896 milyon manata yüksəlib.
Bu dövrdə bankın depozit portfeli 178 milyon manat artaraq 385 milyon manat olub.
Bankda fiziki şəxslərin depozitləri 2,1 dəfə artaraq 94 milyon manatdan 201 milyon manata yüksəlib.
Hüquqi şəxslərin depozitləri isə 70 milyon manat və ya 63% artaraq 110 milyon manatdan 183 milyon manata yüksəlib.
Eyni zamanda «Azər Türk Bank»ın başqa kredit təşkilatları qarşısında öhdəlikləri də 12 dəfəyə yaxın artaraq 27,4 milyon manatdan 322,6 milyon manata yüksəlib.
Eyni zamanda 2022-ci ildə «Azər Türk Bank»ın 20 milyon manatlıq istiqrazlar və onunla bağlı öhdəlirləri də var.
İlin sonunda bankın kapitalı 12 milyon manat və ya 21% artaraq 57 milyon manatdan 69 milyon manata yüksəlib.
2022-ci ildə «Azər Türk Bank»ın faiz gəlirləri 60%-ə yaxın artaraq 22 milyon manatdan 35 milyon manatı keçib. Bu dövrdə kredit portfelinin gətirdiyi faiz gəlirləri 52%-dən çox artaraq 18 milyon manatdan 27,4 milyon manata yüksəlib.
Başqa banklardakı depozitlər «Azər Türk Bank»a 3,7 milyon manat, qiymiətli kağızlara yatırımlar isə təqribən 3,6 milyon manat gəlir gətirib.
2022-ci ildə «Azər Türk Bank»ın faiz xərcləri 4 milyon manatdan çox və ya 63% artaraq 11 milyon manatı keçib. Bunun böyük hissəsi – 7,7 milyon manatı bankda əmanəti olanlara faiz kimi ödənilib. Bundan başqa, bank öz borcları üzrə 2,9 milyon manat faiz ödəyib.
Nəticədə bankın xalis faiz gəliri 24,2 milyon manat olub.
2022-ci ildə «Azər Türk Bank»ın qeyri-faiz gəlirləri 2,5 dəfə artaraq 13,6 milyon manatdan 34 milyon manata yüksəlib.
Bu dövrdə hesabların aparılması üzrə xidmətlərdən komisyon gəliri 868 min manat olub.
Digər xidmət növləri üzrə komissiya gəlirləri isə 2,3 dəfə artaraq 10,7 milyon manatdan 25,2 milyon manat yüksəlib.
Bundan başqa, bank xarici valyuta ilə əməliyyatlardan gəlirlərini təqribən 3,6 dəfə artıraraq 2,1 milyon manatdan 7,9 milyon manata çatdırıb.
2022-ci ildə «Azər Türk Bank»ın qeyri-faiz xərcləri də kəskin artaraq 29 milyon manatdan 39 milyon manaat yüksəlib.
Hesabat dövründə bankda əmək haqqı xərcləri 3 milyon manat artaraq 14,3 milyon manata yüksəlib. Ümumi və inzibati xərclər isə 4 dəfə artıb – 4,1 milyon manatdan 16,6 milyon manata.
Nəticədə bank ili 18,6 milyon manat əməliyat mənfəəti ilə tamamlayıb.
Xatırladaq ki, 2021-ci ilin sonunda bu rəqəm cəmi 143 min manat idi.
Əməliyyat mənfəətinin 4,1 milyon manatı ehtiyatlar üçün ayrılıb, 3,5 milyon manat isə mənfəət vergisinə xərclənib. Nəticədə bankın xalis mənfəəti 11 milyon 020 min manat olub ki, bu da ötənilki göstəriciyə nisbətən 20 dəfə artıqdır.
Bankın aktivlərinin gəlirlilik əmsalı (ROA) 1,6%, kapitalın gəlirlilik əmsalı (ROE) dəfələrlə artaraq 22% təşkil etmişdir.
