2022-ci ilin ilk 4 ayında azərbaycanda daşınmaz əmlakların üzərində mülkiyyət hüququ ilə bağlı 107 552 əməliyyat aparılıb.
Eləcə də bax: Apreldə 500-dən çox icarə müqaviləsi - BAĞLANIB
Əmlak Məsələləri Dövlət Xidmətindən FED.az-a verilən məlumata görə, yanvar-aprel ayları ərzində 107 552 daşınmaz əmlak üzərində mülkiyyət hüququnun qeydiyyatı aparılıb. Bu, ötən ilin eyni dövrü ilə müqayisədə 12,2% çoxdur.
4 aylıq göstəricinin 26 354-ü (24,5%-i) ilkin, 81 198-i (75,5%-i) isə təkrar qeydiyyatın payına düşüb. Başqa sözlə, ilk 4 ayda ölkədə 81,2 min əmlak alınıb-satılıb və ya bağışlanaraq qeydiyyata alınıb, 26,4 min əmlaka isə ilk dəfə çıxarış («kupça») verilib.
Ötən ilin eyni dövrü ilə müqayisədə bu il ilkin qeydiyyat, yəni «kupça» verilən əmlakların sayı 13,7% artıb.
Son illərdə olduğu kimi, ölkədə əməliyyat aparılan obyektlərin yarıdan çoxu torpaq sahəsidir. Mülkiyyət hüquqlarının qeydiyyatı aparılan əmlaklardan 15 037-i fərdi yaşayış və bağ evi, 26 975-i mənzil, 61 841-i torpaq sahəsi, 1 147-i qeyri-yaşayış binası, 2 261-i qeyri-yaşayış sahəsi, 274-ü əmlak kompleksi, 16-sı çoxmərtəbəli yaşayış binası, 1-i isə çoxillik əkmələrdir.
Qeyd edək ki, yanvar-aprel ayları ərzində üzərində əməliyyat aparılmış hər 4 əmlakdan 3-ü regionda yerləşir. Belə ki, dövlət qeydiyyatına alınan daşınmaz əmlakların 28 397-si Bakı şəhərinin, qalanları isə bölgələrin payına düşür.
