Azərbaycanda kredit alınarkən ən çox girov qoyulan əmlaklar və girovların ən çox qoyulduğu regionlar açıqlanıb.

Lombarddan pul götürənlərin - DİQQƏTİNƏ! - VİDEO

FED.az xəbər verir ki, Azərbayanda əmlaklar əsasən sahibkarlar və adi vətəndaşlar tərəfindən bankdan kredit götürəndə girov qoyulur. Yaşayış evi və ya mənzillər ipoteka krediti götürüləndə, eləcə də digər əmlaklar biznes kreditləri götürəndə girov qoyulur.

Son aylar Azərbayganda iqtisadi aktivliyin artması, eləcə də, kredit münasibətlərinin canlanması girovların da sayının kəskin artması ilə nəticələnir. Bu proses 2022-ci ildə də davam edir.

Cari ilin yanvar-iyun ayları ərzində bağlanan girov müqavilələri

İqtisadiyyat Nazirliyi yanında Əmlak Məsələləri Dövlət Xidmətinin verdiyi məlumata görə, 2022-ci ilin yanvar-iyun ayları ərzində Azərbaycanda 34 126 daşınmaz əmlak üzrə girov müqaviləsi qeydə alınıb. Bu, ötən ilin eyni dövrü ilə müqayisədə 10 902 və ya 46,9% artıq olub.

Ən çox girov qoyulan daşınmaz əmlaklar

2022-ci ilin 6 ayı ərzində Azərbaycanda girov qoyulan əmlaklar sırasında mənzillər, torpaq sahələri və fərdi yaşayış evləri ilk 3-lükdədir. Ən çox girov qoyulan daşınmaz əmlak mənzillərdir. Belə ki, 2022-ci ilin yanvar-iyun ayları ərzində 19 949 mənzil üzrə girov müqaviləsi bağlanılıb. Cari ilin 6 ayı ərzində girov qoyulmuş ümumi əmlakdan 5 826-sı fərdi yaşayış evinin, 5 668-i isə torpaq sahəsinin payına düşüb.

        Daşınmaz əmlak üzrə ən çox girov müqaviləsi ölkənin iqtisadi mərkəzi sayılan Bakıda bağlanılıb. Cari ilin yanvar-iyun ayları ərzində paytaxtda ümumilikdə 18 853  girov müqaviləsi bağlanılıb ki, bu da ölkə üzrə ümumi göstəricinin 55,2%-i və ya yarıdan çoxu deməkdir. Bakıdan sonra ən çox girov müqaviləsi Abşeron (3 798 müqavilə), Sumqayıt (2 392 müqavilə), Gəncə (1 755 müqavilə) və Xaçmaz ərazi idarələrində (1 434 müqavilə) bağlabılıb. Həmçinin, Yevlax və Bərdə ərazi idarələri də ən çox girov qoyulan bölgələr sırasındadır. Bu nəticələri həm də bölgədəki iqtisadi aktivliyin göstəricilərindən biri kimi qəbul etmək olar.

Bakıda mənzillər, regionda torpaqlar girov qoyulub

         Ayrı-ayrı əmlak növləri üzrə girovların ölkənin regionlar üzrə bölgüsünə nəzər saldıqda isə daha maraqlı nəticələr ortaya çıxır. Belə ki, cari ilin yanvar-iyun ayları ərzində ölkədə mənzillərin ən çox girov qoyulduğu ərazilər Bakı, Sumqayıt və Abşerondur. Bütün girov qoyulan mənzillərin 92,2%-i bu üç ərazi idarəsinin payına düşür. Ölkənin regionlarında isə mənzillərin ən çox girov qoyulduğu bölgələr 3 saylı Gəncə, 17 saylı Yevlax, 13 saylı Şirvan ərazi idarələrinin xidmət dairəsində yerləşən şəhər və rayonlar üzrə müəyyən olunub. Mənzillərin ən az girov qoyulduğu bölgələr isə 14 saylı Şamaxı (10 müqavilə) və 9 saylı Qəbələ (8 müqavilə) ərazi idarələridir.

         Mənzillərin ən çox girov qoyulduğu bölgələr

          2022-ci ilin ilk yarımilliyi ərzində girov qoyulan fərdi yaşayış evlərinin sayına görə paytaxt ilk yeri tutur. Ancaq bölgələrdə də bu kateqoriya üzrə aktivlik müşahidə olunur. Ölkənin bölgələrində fərdi yaşayış evlərinin ən çox girov qoyulduğu rayonlar 3 saylı Gəncə, 5 saylı Xaçmaz,  7 saylı Bərdə, və  2 saylı Sumqayıt ərazi idarələrinin dislokasiyalarında yerləşir.

Fərdi yaşayış evlərinin ən çox girov qoyulduğu bölgələr

          Cari ilin 6 ayı ərzində ən çox torpaq sahəsinin girov qoyulduğu ərazilər sırasında ilk üçlüyü müvafiq olaraq 5 saylı Xaçmaz, 1 saylı Bakı və 4 saylı Abşeron ərazi idarələri tamamlayır. Torpaqların ən az girov qoyulduğu bölgələr isə 8 saylı Cəlilabad (80 müqavilə) və 15 saylı Tovuz (73 müqavilə) ərazi idarələridir.

Torpaq sahələrinin ən çox girov qoyulduğu bölgələr