Naxçıvan MR-in Babək şəhərində Vergi ödəyicilərinə xidmət mərkəzi istifadəyə verilib.
FED.az xəbər verir ki, bununla əlaqədar keçirilən açılış mərasimində Azərbaycan Prezidentinin Naxçıvan MR-də səlahiyyətli nümayəndəsi Fuad Nəcəfli, Naxçıvan MR-ə səfər edən İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli və onu müşayiət edən şəxslər, eləcə də Naxçıvan MR iqtisadiyyat nazirinin müavini, nazir vəzifəsini müvəqqəti icra edən Abbas İsmayılov, muxtar respublikanın hökumət rəsmiləri, sahibkarlar və ictimaiyyət nümayəndələri iştirak ediblər.
Prezidentin səlahiyyətli nümayəndəsi Fuad Nəcəfli Naxçıvanda vergi ödəyicilərinə keyfiyyətli xidmətlərin göstərilməsinin, bu məqsədlə xidmət mərkəzlərinin qurulmasının diqqətdə saxlanıldığını bildirib. Qeyd edib ki, 2023-cü ilin may ayında Naxçıvan, 2024-cü ilin fevral ayında isə Ordubad və Şərur şəhərlərində vergi ödəyicilərinə xidmət mərkəzləri istifadəyə verilib. Bu gün isə analoji xidmət Babək rayonunda təşkil olunur.
“Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nın ötən ildən icra olunduğunu xatırladan səlahiyyətli nümayəndə vurğulayıb ki, belə mərkəzlərin yaradılması Dövlət Proqramının icrası ilə birbaşa bağlıdır. Vergi ödəyicilərinə xidmət mərkəzi bu sahədə işin səmərəliliyini və xidmətin keyfiyyətini daha da artıracaq. Mərkəzin müasir imkanları hesabına vergi ödəyicilərinin müraciətlərinə qısa zamanda reaksiya veriləcək, problemləri yerində həll olunacaq. Bütün bunlar sahibkarlığın inkişafına böyük dəstəkdir.
İqtisadiyyat Nazirliyi yanında Dövlət Vergi Xidmətinin (DVX) rəisi Orxan Nəzərli bildirib ki, DVX-nin 2024-2030-cu illər üçün inkişaf strategiyasının mühüm bir hissəsi effektiv vergi xidmətləri sisteminin təşkili ilə bağlıdır. Bu gün əsas hədəflərdən biri vergi orqanının müştəriyönümlü fəaliyyəti və xidmətlərin vergi ödəyicilərinin ehtiyac və gözləntilərinin ödənilməsinə istiqamətlənib. Orxan Nəzərli qeyd edib ki, Babəkdə açılan yeni mərkəz vergi ödəyicilərinə göstərilən müasir xidmətlər dairəsinin genişləndirilməsi istiqamətində tədbirlərin növbəti mərhələsidir. DVX rəisi xidmət mərkəzinin rayon ərazisində fəaliyyət göstərən sahibkarlara vergi məsələlərində zəruri dəstəyi təmin edəcəyinə əminliyini diqqətə çatdırıb.
Naxçıvan MR iqtisadiyyat nazirinin müavini, nazir vəzifəsini müvəqqəti icra edən Abbas İsmayılov bildirib ki, muxtar respublikada fəaliyyət göstərən ən yeni avadanlıqlarla təchiz edilmiş modern xidmət mərkəzləri geniş funksiyalara malik olmaqla, ümumilikdə 51.400-ə yaxın vergi ödəyicisinə vergi sahəsi üzrə bütün xidmətləri təqdim edir və onların vergi məsələlərinin həllinə dəstək göstərir.
Sonra Vergi Ödəyicilərinə Xidmət Mərkəzi ilə tanışlıq olub. Tədbir iştirakçıları mərkəzin tikinti prosesi haqqında çarxa baxıb, buradakı texniki imkanlar və vergi ödəyiciləri üçün yaradılmış şəraitlə tanış olublar. Bildirilib ki, ən yeni avadanlıqlarla təchiz edilmiş müasir dizaynlı xidmət mərkəzi geniş funksiyalara malikdir. Mərkəzdə sahibkarlara vergi uçotuna alınmaq, vergi qanunvericiliyinin tətbiqi, bəyannamə və hesabatların tərtib edilməsi və göndərilməsi, vergi ödəyiciləri ilə vergi orqanı arasında elektron sənəd mübadiləsinin aparılması, “ASAN İmza” sertifikatlarının verilməsinə dair xidmətlər göstəriləcək.
Xidmət mərkəzində özünəxidmət bölməsi qurulub, vergi ödəyicilərinə büdcəyə olan borclarını öyrənmək və öz şəxsi vərəqələrinə nəzər salmaq üçün imkan yaradılıb. Sabit vergi ödəyən fiziki şəxslər sadələşdirilmiş vergi üzrə sabit məbləğin ödənilməsi haqqında qəbzi də xidmət mərkəzindən əldə edə biləcəklər. Bununla yanaşı, mərkəzdə şəhid ailələri və Vətən müharibəsi qazilərinə növbədənkənar xidmət göstərilməsi təmin olunub.
Mərkəzlə tanışlıq zamanı Naxçıvan MR iqtisadiyyat nazirinin müavini, nazir vəzifəsini müvəqqəti icra edən Abbas İsmayılov MR-də yaradılmış əlverişli biznes mühiti və tətbiq edilən müasir vergi inzibatçılığı nəticəsində 2024-cü ilin yanvar – iyun ayları ərzində əldə olunmuş bəzi göstəricilər barədə təqdimat edib. Bundan başqa, Naxçıvan MR İqtisadiyyat Nazirliyinin əməkdaşlarının “Naxçıvanın turizm potensialı” və “Naxçıvanın logistika və nəqliyyat potensialı” mövzularında təqdimatları dinlənilib.
Ən son texnoloji yeniliklər, elektron növbə və müasir xidmət avadanlıqları ilə təmin olunan mərkəzə müraciət edən vergi ödəyicilərinə xidmət prosesi əyani şəkildə göstərilib.
