Azərbaycanda POS-terminalların tətbiqi ilə bağlı mühüm yenilik baş verib.
FED.az xəbər verir ki, Nazirlər Kabinetinin 19.05.2022-ci il tarixli qərarı ilə artıq mobil cihazlardan POS-terminal kimi istifadə etmək mümkün olacaq.
Pos-terminallarla bağlı yeni qərar – TAM MƏTN
Xatırladaq ki, Nazirlər Kabineti 19 may tarixində qəbul etdiyi qərarla iki qaydaya dəyişiklik edib. Bunlar «Azərbaycan Respublikasının ərazisində POS-terminalların quraşdırılması, istifadəsi və tətbiqi Qaydaları» və «POS-terminallar quraşdırılacaq obyektlərin müəyyənləşdirilməsi meyarları»dır (2012-ci il 4 oktyabr tarixli 219 nömrəli Qərar).
Nazirlər Kabinetinin yaydığı məlumatda bildirilir ki, yeni qərarla pos-terminal qaydaları sadələşib. «Qərar ilə nağdsız ödənişlərin qəbulunda lazımi proqram təminatı ilə təmin edilmiş mobil cihazların da POS-terminal kimi istifadəsi üçün hüquqi əsas yaradılmış, POS-terminalların qeydiyyatı ilə bağlı bir sıra proseslər sadələşdirilmişdir»-deyə açıqlamada bildirilir.
«Eyni zamanda bu yenilik bank və sahibkarların xərclərinin azaldılması təmin ediləcəkdir»-deyə Nazirlər Kabineti bildirib.
Sözügedən qərar doğrudan da sahibkarlar və banklar üçün olduqca sərfəli imkanlar yaradıb. Belə ki, kartla olan ödənişlərin qəbulu üçün pos-terminal almaq tələb olunmayacaq.
Daha sadə desək, artıq smartfonlara əlavə funksionallıq verilməsi və ya tətbiqin yazılması nəticəsində smartfonu posterminal kimi istifadə etmək mümkün olacaq.
Yeni qərardan sonra terminallarla bağlı hazırda mövcud olan bir sıra problemli məqamlar da aradan qalxa bilər.
Əvvəla terminalın quraşdırılmasına əlavə vaxt tələb olunurdu. Digər tərəfdən banklar POS-terminal quraşdırılması müqabilində sahibkarlıq subyektlərindən 700-800 manat depozit tələb edirdilər, amma smartfonlardan istifadə ilə bu hal aradan qalxacaq. Nəhayət, prosesə mobil internet və smartfonların qoşulması banklar arasında rəqabəti də artıracaq və bu da xidmət haqlarının aşağı düşməsi ilə nəticələnəcək.
