Dövlət Vergi Xidməti yanvar-iyul aylarında vergi və DSMF ödənişləri ilə bağlı vəziyyəti açıqlayıb.
Eləcə də bax: Azərbaycanda nəzarət-kassa aparatları üzrə dövriyyə - 2,1 Dəfə Artıb
FED.az xəbər verir ki, vergi əməkdaşları ilk 7 ayda vergi planınından əlavə 1,1 milyard manat vəsait toplayıblar.
«2021-ci ilin yanvar-iyul ayları ərzində dövriyyələrin şəffaflaşdırılması istiqamətində aparılan işlər, vergi inzibatçılığının daha da təkmilləşdirilməsi, iqtisadiyyatın ayrı-ayrı sektorlarında müşahidə edilən bərpa templəri vergi və sosial sığorta daxilolmalarının artımına səbəb olub»-deyə xidmətdən bildirilib.
2021-ci ilin yanvar-iyul aylarında İqtisadiyyat Nazirliyi yanında Dövlət Vergi Xidmətinin xəttilə dövlət büdcəsinə 5 milyard 273,7 milyon manat vergi daxil olub, proqnoza 126,2 faiz əməl edilib. Yəni proqnozdan əlavə 1 milyard 94 milyon manat vəsait toplanıb. Ötən ilin müvafiq dövrü ilə müqayisədə vergi daxilolmaları 14,2 faiz və ya 655,9 milyon manat artıb.
Cari ilin 7 ayında qeyri-neft-qaz sektorundan daxilolmalar 3 milyard 813,2 milyon manat olub, proqnoza 119,7 faiz əməl edilib. Yəni qeyri-neft sektorundan dövlət büdcəsinə proqnozdan əlavə 628,1 milyon manat daxil olub. Ötən ilin müvafiq dövrü ilə müqayisədə bu sektordan vergi daxilolmaları 11,1 faiz və ya 382,2 milyon manat artıb.
Qeyri-neft-qaz sektorunun özəl bölməsi üzrə cəmi vergi daxilolmaları əvvəlki ilin eyni dövrü ilə müqayisədə 19,6 faiz artaraq 2 milyard 926,8 milyon manat təşkil edib. Regionlar üzrə daxilolmalar 549,4 milyon manat olmaqla, proqnoz 118,3 faiz icra edilib, ötən illə müqayisədə bu mənbədən daxilolmalar 4,8 faiz artıb.
Ödənilən vergilərin 72,3 faizi qeyri-neft-qaz sektorunun, 27,7 faizi neft-qaz sektorunun payına düşüb.
