Ədliyyə Nazirliyi tərəfindən maliyyə təminatı həyata keçirilən məhkəmələrin inzibati binalarında cari təmir işlərinin satın alınması ilə bağlı elan edilmiş tenderin nəticəsi açıqlanıb.
FED.az xəbər verir ki, tenderin qalibi "Tvm İnşaat" Məhdud Məsuliyyətli Cəmiyyəti olub. Müqavilənin ümumi dəyəri 1 milyon 159 min manat təşkil edir. Ehtimal olunan qiymət isə 1 milyon 171 min 987 manat 63 qəpik idi.
Qeyd edək ki, "Tvm İnşaat" MMC dövlət satınalmalarında fəal iştirak edən şirkətlərdəndir və bundan əvvəl də müxtəlif dövlət qurumlarının irimiqyaslı layihələrinin icrasını həyata keçirib. Şirkətin qalib gəldiyi digər tenderlər aşağıdakılardır:
Fövqəladə Hallar Nazirliyinin Əsaslı Tikinti İdarəsi tərəfindən FHN Dövlət Yanğından Mühafizə Xidmətinin 4 çıxışlı Zəngilan Rayon Dövlət Yanğından Mühafizə Hissəsinin tikintisi üzrə keçirilən tenderin qalibi olub. Müqavilənin dəyəri 3 milyon 289 min 698 manat 44 qəpik təşkil edib (17.11.2025).
Ədliyyə Nazirliyi tərəfindən inzibati binalarda cari təmir işlərinin satın alınması üzrə keçirilən başqa bir tenderdə qalib gəlib. Müqavilənin dəyəri 398 min 814 manat 55 qəpik olub (13.11.2025).
Ağdam, Füzuli və Xocavənd rayonlarında Bərpa, Tikinti və İdarəetmə Xidməti tərəfindən Füzuli rayonu, Dövlətyarlı kəndi üzrə fərdi yaşayış evlərinin, qeyri-yaşayış binalarının, sahədaxili mühəndis kommunikasiyalarının tikintisi layihəsini icra edib. Bu, şirkətin ən iri layihələrindən biri olub və dəyəri 97 milyon 212 min 804 manat 98 qəpik təşkil edib (09.10.2024).
Ədliyyə Nazirliyi tərəfindən Bakı Ağır Cinayətlər Məhkəmə kompleksinin tikintisi üzrə keçirilən tenderin qalibi olub. Müqavilənin məbləği 25 milyon 781 min 428 manat 24 qəpik təşkil edib (28.12.2024).
Ekologiya və Təbii Sərvətlər Nazirliyi yanında Meşələrin İnkişafı Xidməti tərəfindən Cəbrayıl rayonunda Qarabağ Meşəçilik və Təlim Mərkəzinin tikintisi üzrə tenderin qalibi olub. Dəyəri 3 milyon 335 min 391 manat 40 qəpik olub (04.04.2023).
"Bakı Şəhər Əsaslı Tikinti və Təmir" MMC tərəfindən Xətai rayonu 263 nömrəli orta məktəbin korpuslarının bərpa-gücləndirilməsi işləri üzrə tenderdə qalib gəlib. Müqavilənin dəyəri 1 milyon 496 min 16 manat 99 qəpik təşkil edib (04.08.2020).
