Banner

Tenderlər

Bakı İcra Hakimiyyətinin 500 manata aldığı zibil qutuları – ƏSLİNDƏ NEÇƏYƏDİR? - HESABLAMA

Bakı İcra Hakimiyyətinin 500 manata aldığı zibil qutuları – ƏSLİNDƏ NEÇƏYƏDİR? - HESABLAMA | FED.az
18:24 14 İyun 2020

Xəbər verildiyi kimi, iyunun 14-15-də sərt karantin günlərində Bakı sakinlərinin zibil atmaq üçün uzaq məsafə qət etməsinin qarşısını almaq üçün şəhər icra hakimiyyəti çoxmərtəbəli yaşayış binalarının həyətlərinə, blokların çıxışına yaxın yerlərdə məişət tullantılarının atılması üçün tullantı konteynerləri yerləşdirib. 

Dövlət tenderlərindən ən çox pul qazanan - 50 ŞİRKƏT – SİYAHI - MƏBLƏĞLƏR

FED.az xatırladır ki, bu işlər çərçivəsində paytaxtda ümumilikdə 1000-dən artıq konteyner yerləşdirilib. «Bu da 2 günlük sərt karantin günlərində sakinlərin problemlərinin həllinə kömək olacaqdır»-deyə icra hakimiyyətinin bununla bağlı açıqlamasında bildirilir. 

Azərbaycanda ən çox sayda tender udan - 21 ŞİRKƏT – SİYAHI

Karantin rejimi və zibil konteynerləri ilə bağlı açıqlama həmin konteynerlərin necə alındığını gündəmə gətirib.

FED.az xəbər verir ki, icra hakimiyyəti bu konteynerləri 2020-ci ilin aprel ayında alıb. Bakı Şəhər İcra Hakimiyyətinə tabe olan "Bakı şəhər Əsaslı Tikinti və Təmir" MMC-nin elan etdiyi - 10 min ədəd zibil qutularının alınması ilə bağlı tenderin qalibi "Tikinti-Təmir-Təchizat-Bərpa" QSC olub.  
Həcmi 1100 litr olan, 4 təkərli, xüsüsi mexanizmli qapağı olan, əyləc sistemli 10 min ədəd zibil qutusu satın almaq üçün "Tikinti-Təmir-Təchizat-Bərpa" QSC ilə müqayilə bağlanıb və bu qutuların alınması 4 milyon 993 min 996 manata, təqribən 5 milyon manata başa gəlib. Başqa sözlə, hər zibil qutusunun alınması üçün büdcədən 499,4 manat xərclənib. 
Halbuki, «Alibaba» beynəlxalq ticarət platformasında eyni qutuların qiyməti 70-80 dollar arasında dəyişir, qeyd edək ki, 70-80 dollar qiymət böyük həcmli partiyalar üçündür. Bakı İcra hakmiyyəti isə 10 min ədəd konteyner aldığına görə, bu kateqoriyaya düşür.

Belə satış elanlarından birinə əsasən, zibil qutularının qiyməti 140 dollardan başlayır, amma bu yalnız 9 ədədə qədər olan partiyaya aiddir. Alınan qutunun sayı artdıqca qiyməti də azalır, belə ki, 10-49 ədəd aldıqda qiymət 120 dollar, 50-99 ədəd aldıqda 100 dollar, 100 ədəddən artıq aldıqda isə qutunun qiyməti 80 dollara enir.

İstehsalçının məlumatına görə, qutular Avropa standartlarına da cavab verir və dünyanın əksər ölkələrinə, o cümlədən ABŞ və Avropa ölkələrinə göndərilir. Qutulara 3 il zəmanət verilir, 1 il müddətinə xarab olun qutu yenisi ilə, 2 il müddətində 2 qutu biri ilə, 3 il müddətində isə 3 qutu biri ilə dəyişdirilə bilər.

Doğrudur, 70-80 dollar qiymət zibil qutularının FOB qiymətidir, yəni onun alıcısı daşıma və digər xərcləri də çəkməlidir.
FED.az-ın müraciət etdiyi satınalma üzrə mütəxəssislərin hesablamalarına görə, «Alibaba»da satış qiymətinin hətta 100 dollar  olduğu halda, zibil qutularının alınaraq Azərbaycana çatdırılması gömrük rəsmiləşməsi və nəqliyyat xərcləri ilə birlikdə 186 dollara başa gəlir. Bunun üzərinə 10-15% mənfəəti, yəni 30-50 manat əlavə etdikdə zibil qutuları Bakıya 350-360 manatdan baha olmayan qiymətə çatdırıla bilərdi. İcra hakimiyyətinin ödəjiyi məbləğ isə hər qutuya görə, 140-150 manat artıqdır. 

Konteynerlərin sayını – 10 min ədəd – nəzərə alanda artıq ödənilən məbləğ təqribən 1,4-1,5 milyon manat təşkil edir.  Maraqlıdır ki, eyni ölçüdə zibil qutulari Azərbaycanın populyar alqı-satqı saytı olan tap.az-da daha ucuz qiymətə satılır. FED.az-in məlumatına görə, 1100 litrlik zibil qutusu saytda 390 manata təklif edilir. Amma bu, FED.az-ın müraciət etdiyi mütəxəssislərin hesablamasıdır.    

FED.az alış qiymətinin necə formalaşmasını öyrənmək üçün Bakı İcra Hakimiyyəti, tenderi elan edən və qutuları alan "Bakı şəhər Əsaslı Tikinti və Təmir" MMC, eləcə də tenderin qalibi olan "Tikinti-Təmir-Təchizat-Bərpa" QSC ilə əlaqə saxlamağa çalışsa da bu mümkün olmayıb. 

 

Digər xəbərlər

Banner