Nestlé SA cümə axşamı bildirib ki, şirkət qlobal miqyasda təxminən 16 000 iş yerini ixtisar edəcək və 2027-ci ilə qədər xərclərə qənaət hədəfini 3 milyard İsveçrə frankı səviyyəsinə qaldıracaq. Bu qərar, 2025-ci ilin ilk doqquz ayında satışların azalması fonunda verilib.
«Starbucks»ın bahalı lattesi artıq dəbdə deyil, rəqabətə dözmür - YÜZLƏRLƏ RESTORANI BAĞLANACAQ
Satışları azalıb
FED.az xəbər verir ki, hesabat dövründə şirkətin ümumi satışları keçən ilin analoji dövrü ilə müqayisədə 1,9% azalaraq 67,1 milyard İsveçrə frankından 65,9 milyar İsveçrə frankına enib. Bu azalma əsasən 5,4%-lik mənfi valyuta məzənnəsi təsiri ilə bağlı olub.
Bununla yanaşı, üzvi satış artımı (organic growth və ya üzvi artım — şirkətin satış və ya gəlirindəki artımın yalnız mövcud biznes fəaliyyətlərindən qaynaqlanan hissəsini ifadə edir) 3,3% təşkil edib ki, bu da 0,6% real daxili artım və 2,8% qiymət artımı hesabına baş verib. Üçüncü rübdə üzvi artım 4,3%-ə, real daxili artım isə 1,5%-ə yüksəlib.
Nestlé-nin baş direktoru Filipp Navratil bildirib ki, şirkətin əsas prioriteti böyüməni gücləndirmək və resurslardan daha intizamlı istifadə etməkdir:
“RIG-yönümlü (real daxili artım) böyüməni davam etdirmək bizim bir nömrəli prioritetimizdir. Dünya dəyişir və Nestlé daha sürətli dəyişməlidir,” – deyə Navratil vurğulayıb.
Qlobal restrukturizasiya və qənaət planı
Şirkətin restrukturizasiya planı 12000 ofis, 4000 istehsal və təchizat işçilərinin ixtisarını əhatə edir. Tədbirlərin 2027-ci ilə qədər illik 1 milyard İsveçrə frannkı qənaət təmin edəcəyi gözlənilir.
Nestlé bildirib ki, bu dəyişikliklər genişləndirilmiş “Fuel for Growth” proqramının bir hissəsidir. Proqramın məqsədi əməliyyat səmərəliliyini artırmaq və biznes transformasiyasını sürətləndirməkdir.
Nestlé 2025-ci il üçün proqnozunu təsdiqləyib. Şirkət üzvi satış artımının 2024-cü ilə nisbətən yaxşılaşacağını, əməliyyat mənfəət marjasının isə 16%-ə çatacağını və ya onu keçəcəyini gözləyir.
Navratil bildirib ki, Nestlé bundan sonra ən yüksək gəlir potensialı olan biznes sahələrinə fokuslanacaq və innovasiyalara daha cəsarətli sərmayə yatıracaq:
“Biz daha böyük miqyasda sərmayə qoyacaq və innovasiyaları irəli apararaq sürətli böyümə və dəyər yaratmağa çalışacağıq,” – deyə o əlavə edib. (Marja)
