Azərbaycandan bu ilin yanvar-iyul aylarında xarici ölkələrə ümumilikdə 16 min 481 ton qarpız ixrac edilib.

• Xaricdən gətirilən qarğıdalı bahalaşıb - İDXAL KƏSKİN AZALIB

FED.az bu barədə Dövlət Statistika Komitəsinə istinadən xəbər verir.

Məlumata görə, ixrac edilmiş qarpızın ümumi dəyəri isə 7 milyon 562 min dollar olub.

Son bir il ərzində ixracın həcmində 8 min 44 ton (95,4%), dəyərində isə 3 milyon 544 min dollar (88,2% ) artım baş verib.

Qeyd edək ki, 2024-cü ilin yanvar-iyul ayında isə Azərbaycan xarici ölkələrə 4 milyon 18 min dollar dəyərində 8 min 437 ton qarpız ixrac etmişdi.

Bu ilin yanvar-iyul aylarının nəticələrinə görə ixrac edilmiş qarpızın orta hesabla 1 tonunun dəyəri 780 manat olub ki, (1 kq-78 qəp) bu da 2024-cü ilin müvafiq göstəricisinə görə 29 manat (3,6%) azdır. Ötən ilin müvafiq dövründə bu göstərici 809 (1kq - 91 qəp) manata bərabər olub.

Hesabat dövründə qarpız ən baha qiymətə Səudiyyə Ərəbistanına (1 ton 13 167 manat), ən ucuz qiymətə Gürcüstana (1 ton 547 manat) ixrac olunub.

Azərbaycanın 2024 və 2025-ci illərin ilk yeddi ayı üzrə qarpız ixracının müqayisəsi, bazarda partlayış həcmində artımın yaşandığını göstərir. Ümumi ixrac həcmi təxminən 2 dəfə (8 044 ton) artaraq 16 481 tona, ixracdan əldə edilən gəlir isə 1,9 dəfə (3,54 milyon dollar) artaraq 7,56 milyon dollara çatıb.

 Rusiya və Belarus bazarlarında genişlənmə

İxracdakı bu kəskin artımın əsas səbəbi iki əsas bazarda – Rusiya və Belarusda mövqelərin ciddi şəkildə gücləndirilməsidir. Ölkənin bir nömrəli qarpız alıcısı olan Rusiya, alış həcmini 2,6 dəfə artıraraq 5 279 tondan 13 771 tona çatdırıb. Nəticədə Rusiyadan əldə edilən gəlir 2,3 dəfə artaraq 6,4 milyon dolları ötüb.

Digər mühüm artım Belarus bazarında qeydə alınıb. Bu ölkəyə ixrac həm həcm, həm də dəyər baxımından 2 dəfə artıb. Belarus 1 245 tonluq alışla ikinci ən böyük bazar olaraq qalır.

 Ukrayna və Gürcüstan bazarlarında geriləmə

Müsbət dinamikaya baxmayaraq, bəzi ənənəvi bazarlarda ciddi geriləmə müşahidə olunur. Ukraynaya edilən ixrac həcmcə 1,4 dəfə azalıb. Ən kəskin azalma isə Gürcüstan bazarında yaşanıb. 2024-cü ildə 843 ton qarpız alan Gürcüstana 2025-ci ildə cəmi 96 ton məhsul satılıb ki, bu da 8,8 dəfəlik azalma deməkdir.

2025-ci ildə Polşa yeni, lakin kiçik həcmli (77 ton) bir bazar kimi ixrac siyahısına daxil olub. Ümumilikdə, Azərbaycan qarpız ixracatını Rusiya və Belarus hesabına kəskin şəkildə artırsa da, Ukrayna və Gürcüstan kimi qonşu bazarlardakı mövqelərini zəiflədib.