Azərbaycanda şirkətlər və gənclər yeni imkanlar yaradan staptap fəaliyyətə başlayıb. Bu startap vasitəsilə tələbə və məzunlar şirkətlərdə təcrübə proqramlarına qoşula bilərlər. Şirkətlər isə gələcək əməkdaşlarını real işdə yoxlamaq imkanı qazanırlar.
Eləcə də bax: Azərbaycanda kartla bəxşiş ödəmək başlandı – YENİLİK – MÜSAHİBƏ
Təqribən təcrübə proqramı market-pleysi kimi fəaliyyət göstərən startap «Taskilled» adlanır. Onun yaradıcısı - layihənin rəhbəri və «Taskilled»in təsisçisi Nəriman Qaraxani 15 ilə yaxın biznes və akademik təcrübəyə malikdir. Layihəyə pul yatırmaq istəyən investorlar üçün isə bu maraqlı sərmayə və gəlir imkanı ola bilər.
Şirkət təkliflərə açıqdır, amma öz şərtləri ilə...
- Nəriman bəy, bu layihənin mahiyyəti nədən ibarətdir? Startap hansı hansı prinsiplərlə işləyir, hansı problemi həll edir?
- «Taskilled» startapı - portfolio yaratmaq üçün bir platformadır. Portfolio yaratmaq deyəndə, gənclər öz karyeralarını qurmağa başlayarkən biz onlara bir növ yol yoldaşlığı edirik. Bu mənada ki, biz platformamızda təcrübə proqramları yaradırıq. Təcrübə proqramının təşkil olunduğu bir market-pleysik.
- Yəni startap tələbələrə təcrübə proqramı təqdim edir? Bu necə baş verir – siz artıq elan edilmiş təcrübə proqramlarını bir yerə toplayırsız, yoxsa startap özü şirkət üçün təcrübə proqramı yaradıb tələbələrə təklif edir?
- İkinci variant, layihə ilə əlaqəli bir təcrübə proqramlarının təşəbbüskarı bizik. Biz təcrübə proqramlarını yaradırıq. Amma təcrübə roqramlaraının daxiində yerləşdirilmiş tapşırıqları partnyor şirkətlərimizlə danışıb onlardan alırıq. Tapşırıqları proqram daxilində yerləşdiririk ki, təcrübə proqramı real şirkət tapşırıqları daxilində həyata keçirilsin. Yəni tələbələr real işlərlə məşğul olsunlar.
- Təcrübə proqramları üçün tələbə hökmən şirkətə gəlməlidir, yoxsa bunu onlayn da etmək olar?
- İndiki mərhələdə biz onlayn işlənilə bilən təcrübə proqramları həyata keçiririk. Məsələn, rəqəmsal marketinq, mühasibatlıq, dizayn, layihələrin idarə olunması, proqramlaşdırma, data analizi kimi sahələrdə həyata keçiririk. Növbəti mərhələdə isə biz bunu hibrid formada həyata keçirəcəyik. Belə ki, istifadəçilər tapşırıqları əvvəl onlayn formada edəcəklər, sonra isə şirkətlərin özünə getməklə digər tapşırıqları da yerinə yetirəcəklər.
- Nəriman bəy, nə üçün məhz təcrübə proqramı? Bunun vacibliyi nə ilə bağlıdır?
- Gənclər karyera qurmağa başlayarkən qarşılaşdıqları problemlərdən biri də təcrübə və nəzəri biliklərinin yetərli olmamasıdır. Buna görə də biz belə bir layihə həyata keçiririk ki, gənclər bizim platformamızda təcrübə proqramlarına müraciət edərək praktiki bacarıqlara yiyələnsinlər. İş həyatında addım atarkən bu bacarıqları orada göstərə bilsinlər. Platformamızda istənilən proqramda iştirak zamanı tələbələrin etmiş olduqları bütün tapşırıqları biz öz bazamızda saxlayırıq. Qeydiyyatdan keçərkən hər kəs özünə onlayn və yeni bir növ CV forması yaradır. Biz orada görmüş olduqları bütün tapşırıqları saxlayırıq və şirkətlərə də bunu göstərə bilirik.
Necə deyərlər, təhsil alındığı yerdə də qalmır. Biz həm də onların aldıqları təhsili, bilik səviyyəsinə uyğun etdikləri tapşırıqları şirkətlərə göstərə bilirik. Şirkətlər də bunun vasitəsilə qərar qəbul edirlər ki, axtardıqları şəxs hansı səviyyədə biliklərə və bacarıqlara sahibdir.
Eyni zamanda platformamızda iştirak edənlər üzrə müxtəlif məlumatları toplayaraq, “big data” yaradırıq. Məqsədimiz odur ki, istifadəçilərin professional bilik və bacarıqlarını, şəxsi keyfiyyətlərini, komandada işləmək bacarıqlarını ölçərək həmin şirkətlərə sistem şəklində təqdim edək. Şirkətlər də bizim platforamda əməkdaşlıq çərçivəsində daxil olaraq özlərinin ehtiyaclarına uyğun olmaqla platformamızda olan istifadəçilərdən uyğun olanlarını seçərək işlə təmin edirlər.
- Bu layihənin ideyası necə yarandı?
- Ümumiyyətlə, startap hər hansı bir problemin həllinə yönəlmiş bir təşəbbüs deməkdir. Mən də uzun illər əvvəl müəllim işlədiyim üçün təhsil sahəsində yaranan və gənclərin ehtiyac duyğuğu bir boşluğu gördüm. İş həyatında təcrübə problemini müşahidə etdikdən sonra bunu həll etmək qərarına gəldim. Eyni zamanda təkcə Azərbaycan daxilində deyil, beynəlxaq səviyyədə də gənclərin təcrübə qazanmasını məqsəduyğun hesab etdim. Əgər gənclər sahələrinə uyğun xaricdə gedib təcrübə keçmək istəyərlərsə, gedib xarici şirkətlərdə işləsinlər və təcrübələrini Azərbaycanda tətbiq etsinlər. İdeya belə yarandı. Bu yola çıxanda bu ideya da genişləndi.
Onu da deyim ki, ideya əslində boş bir fikirdir, yalnız onu reallaşdıranda dəyər qazanır. Bəzən insanlar ağıllarına gələn fikirləri gizlədirlər, bu starpat sahəsində yayılan haldır. Amma əgər ideya varsa onu gizlətmək yox, əzmlə, araşdırma aparmaqla, çətinliklərdən keçməklə onu həyata keçirməyə çalışmaq lazımdır.
- Nəriman bəy, hazırda neçə şirkətlə əməkdaşlıq edirsiniz və layihənin istifadəçiləri nə qədərdir?
- Bir ay yarımdır ki, platformamızı istifadəyə vermişik. Bu müddət ərzində min nəfərə yaxın istifadəçi platformamızda müxtəlif proqramlarda iştirak edirlər. Hal-hazırda, 10-a yaxın şirkətlə əməkdaşlıq edirik. Təbii ki, əməkdaşlıq sayını artırmaqdayıq.
- Sizin startapa investisiya yatırılırmı, yatırılmırsa gələckdə gözlənilirmi?
- Artıq bir ildən çoxdur ki. fəaliyyətə başlamışıq və öz şəxsi vəsaitlərimiz hesabına fəaliyyət göstəririk.Ancaq yeni ölkələrə, yeni bazarlara çıxa bilməyimiz üçün investisiya cəlb etmək üçün çalışırıq.
- Bu startapda gəlir, qazanc mexanizmi necə qurulub? Layihədən qazanc necə əldə edilir?
- Bu layihədə dediyim kimi iki tərəf var – şirkətlər və tələbələr. Gəlir hər iki tərəfdən əldə edilir. Belə ki, şirkətlər hər hansı bir istifadəçi haqqında məlumat əldə etmək üçün bizə aylıq ödənişlər edirlər. Məbləğ 1 istifadəçi üçün 5 dollar. İstifadəçilər isə iştirak edəcəyi hər bir proqrama görə, ödəniş edirlər – məbləği 10-20 manat arasında dəyişir. Hazırda şirkətlərdən hər hansı bir ödəniş almırıq. Şirkətlərə məlumat bazamızı açıq şəkildə təqdim edirik ki, bizim proqramımızda iştirak edənlərin içindən seçərək işə dəvət edə bilsinlər. Ancaq gələcdə məlumat bazamızı genişləndirdikcə biz artıq həmin məlumatları onlara pullu xidmət kimi aylıq ödənişlər şəklində və ya istifadəçi sayına uyğun şəkildə təqdim edəcəyik.
- Azərbaycandan kənar bazarlara çıxmaq niyyətiniz varmı? Bununla bağlı planlarınız necədir?
- Bildirdiyim kimi «Taskilled» market-pleys kimi fəaliyyət göstərir. Bu proqram çərçivəsində siz öz ehtiyaclarınıza, istədiyiniz ölkədə, istənilən sahə üzrə də müraciət edərək gedə biləcəksiniz. Hazırda, təkcə Azərbaycanda fəaliyyət göstəririk. Gələcəkdə daha 4 ölkənin bazarına daxil olmağı hədəfləyirik. Türkiyə, Orta Asiya, Gürcüstan kimi ölkələrdə fəaliyyət göstərmək üçün bütün işləri görürük.
2023-cü ilin başlanğıcından etibarən yeni bazarlara çıxmağı planlaşdırırıq.
- Layihəyə kənar investor cəlb etmək planınız varmı? Varsa, investorlar buraya hansı şərtlərlə qoşula bilərlər?
- Deməli, hazırda, 15% qarşılığında 250 min dollar investisiya cəlb etmək istəyirik ki, həmin investisiya müəssisələri ilə bazarlara çıxaq. Həmin məbləğdə bizim məqsədimiz daha 4 ölkəniz bazarına çıxmaqdır. Bunlar Türkiyə, Qazaxıstan, Özbəkistan və Gürcüstan bazarlarıdır. 2023-cü ilin sonunadək istifadəçi sayını 10000 nəfərə, illik dövriyyəmizi 2 milyon dollara çatdırmağı planlaşdırıq.
- Nəriman bəy, bu layihənin analoqu varmı?
- Tələbələr, məzunlar, təcrübəsi olmayan şəxslər təcrübə proqramlarında iştirak etmək üçün hər hansı bir şəbəkədə (Linkedİn və bənzər platformalarda) şəxsi axtarış vasitəsi ilə tapa bilirdllər. Lakin biz bunu bir sistem halına gətirmişik. Ola bilsin başqa ölkələrdə lokal variantı var. Ancaq belə bir qlobal səviyyədə sistem demək olar ki, yoxdur. Biz burada istifadəçilərə bir çox üstünlüklər qazandıra bilərik.
Bir məsələni də qeyd edim ki, bizim layihə ilə gələcək prespektivdə yeni növ turistlərin cəlb olunmasında kömək olacaqdır. Belə ki, biz müxtəlif təcrübə proqramları yaratmaqla ölkəmizdə xaricdən tələbələri, gəncləri bu təcrübə proqamların iştirak etmələri üçün gətirə biləcəyik. Onlar uzunmüddətli gələcəklər. Həmin proqramlar 1-2 ay ola bilər. (tech.az)
