Sosial

Pandemiya Bakı sakinlərinin 44%-in - Maddi Durumuna Təsir Edib

Pandemiya Bakı sakinlərinin 44%-in - Maddi Durumuna Təsir Edib | FED.az
15:17 25 May 2020

Koronavirus pandemiyası Bakı sakinlərinin 44%-in maddi durumuna təsir edib

“ACT Azərbaycan” Bakı şəhərində  COVID-19 pandemiyasının  əhaliyə təsirini öyrənmək üçün 30 aprel – 3 may tarixlərində paytaxt sakinləri arasında müxtəlif istiqamətlərdə həyat tərzi sorğusu həyata keçirib.

FED.az xəbər verir ki, araşdırmanın nəticəsinə görə, rəyi öyrənilənlərin 19%-i pandemiyanın onların həyatlarına çox təsir etdiyini, təqribən yarısı isə (48 %) pandemiyanın həyatlarına müəyyən təsirlərini hiss etdiklərini bildiriblər. Hər 3 respondentdən 1-i isə (33 %) pandemiyanın onların həyat tərzinə təsir etmədiyini deyib.

Əksəriyyətin fikrincə (56 %) karantin rejimi ilə bağlı yaranan ən böyük çətinlik onların adət etdikləri və sevdikləri məşğuliyyətləri həyata keçirmələrində yaranmış  məhdudiyyətlər olub. Pandemiya zamanı maddi vəziyyətinin pisləşdiyini bildirənlər 44% təşkil edib. Rəyi soruşulanların 31%-i bildirib ki, onların istifadə etdiyi mal və xidmətlər indi onlar üçün əlçatmazdır. 

COVID-19 pandemiyasından sonra insanlar arasında münasibətlərin necə dəyişəcəyi ilə bağlı verdiyimiz sualımıza cavab olaraq əksəriyyət (41 %)  insanların daha çox özlərinə və yaxınlarına qayğı göstərəcəklərini bildiriblər.

Sorğuda iştirak etmiş respondentlərin 15%-i pandemiya dönəmində yaxınları ilə münasibətlərinin pisləşdiyini, 11% yaxşılaşdığını vurğulayıblar.

Sorğu 30 aprel - 3 may tarixlərində Bakı şəhərində 400 respondent arasında telefon vasitəsilə həyata keçirilib. Sorğu nəticələrinin yanlışlıq həddi maksimum 4.9 %-dir. 

Digər xəbərlər