2025-ci ilin yanvar-fevral aylarında işçilərin əməkhaqqında əhəmiyyətli artım müşahidə olunub.
Cibə düşən manat çoxaldı - ƏHALİNİN GƏLİRLƏRİ 6,6% ARTIB
FED.az bu barədə Dövlət Statistika Komitəsinə istinadən xəbər verir.
Belə ki, 2025-ci ilin yanvar-fevral aylarında Azərbaycanda muzdla çalışan işçilərin orta aylıq nominal əməkhaqqı əvvəlki ilin eyni dövrü ilə müqayisədə 10,2 faiz artaraq 1043,6 manat təşkil edib. Əgər 10,2% artım nəticəsində əməkhaqqı 1043,6 manata çatıbsa, əvvəlki əməkhaqqı təxminən 947,01 manat olub.
Əməkhaqqı sahəsində ən yüksək artım neft-qaz sektorunda qeydə alınıb, burada işçilərin orta maaşı 3643,9 manat olub. Qeyri-neft-qaz sektorunda isə əməkhaqqı orta hesabla 994,8 manat təşkil edib. Dövlət müəssisələrində çalışan işçilərin maaşları 1004,3 manat, özəl sektorda isə 1084,2 manat olub. Bu rəqəmlər, həm dövlət, həm də özəl sektorda əməkhaqqı səviyyəsinin müsbət dəyişdiyini göstərir.
