Dövlət Şəhərsalma və Arxitektura Komitəsi və Əmlak Məsələləri Dövlət Komitəsi vətəndaşları tikinti şirkətləri ilə müqaviləni notarius vasitəsilə bağlamağa çağırır.
FED.az xəbər verir ki, Dövlət Şəhərsalma və Arxitektura Komitəsinin sədri Samir Nuriyev bu barədə deyib:
“İlk növbədə vətəndaşlar çalışsınlar istismara qəbul edilmiş binalardan mənzil alsınlar. Düzdür, tikinti prosesində mənzillər ucuz olur və insanlar bu dövrdə tikinti şirkətlərindən mənzil alırlar. Bu da ola bilər. Bu zaman alqı-satqı prosesinin məhz notarius vasitəsilə həyata keçirilməsini vacib hesab edirik. Çünki bu zaman dövlət orqanları alıcıların hüquq və mənafelərini qoruya bilir. Müqavilə notarius vasitəsilə bağlandıqda gələcəkdə məhkəmə yolu ilə hüquqları tələb etmək olur. Bir çox hallarda mənzillərin alqı-satqısı hüquqi qüvvəsi olmayan müqavilələr ilə həyata keçirilir”.
Əmlak Məsələləri Dövlət Komitəsinin sədr müavini Rafiq Cəlilov bu barədə bildirib:
“Tikinti şirkətlərinin vətəndaşlar qarşısında öhdəlikləri var. İstər mənzil tikinti kooperativi (MTK), istər məhdud məsuliyyətli cəmiyyət (MMC) olsun. Mənzilləri alqı-satqı müqavilələri ilə satırlar. Öhdəliklərdən biri də binanın istismara qəbul edilməsilə bağlıdır. Yəni, bina tikildikdən sonra istismara qəbul etdirilməlidir. Mənzil tikinti kooperativlərindən başqa digər hüquqi və fiziki şəxslər mənzilləri yalnız özlərinin hüquqlarını dövlət reyestrində tanıtdırdıqdan sonra notarial qaydada vətəndaşlara sata bilərlər. Yalnız mənzil tikinti kooperativləri maliyyə arayışı və iclas pratokolundan çıxarışı vətəndaşa təqdim etməlidirlər. Vətəndaş da bu sənədlər ilə reyestrə müraciət etməlidir. Digər tikinti şirkətləri öz hüquqlarını tanıtdırdıqdan, çıxarış aldıqdan sonra notarial qaydada mənzilləri vətəndaşlara sata bilərlər”.
Eləcə də bax: Azərbaycanda tikinti şirkəti hökumətə müraciət etdi - «EVLƏRİ BİZDƏN ALIN»
©Marja
