“Lady Sharm” mağazalar şəbəkəsində saxta məhsulların satılması ilə bağlı yayılan xəbərlər ölkə gündəmini məşğul edib. Yaranan mənzərə isə digər brend mağazaları da şübhə altında qoyub. Belə ki, alıcılar artıq digər mağazalara da şübhə ilə yanaşır, aldıqları məhsullarda tərəddüd edirlər.
FED.az xəbər verir ki, müştəri paltar aldıqda üzərindəki etiketlərin orijinal olub-olmadığını müəyyənləşdirməkdə çətinlik çəkir. Xüsusilə brend olduğu düşünülən malların yarlığının peşəkarlıqla üzərinə tikilərək satışa çıxarılması insanları yanıldır. Bununla kifayətlənməyən işbazlar hətta brend olmayan məhsullara endirim yazmaqla da alıcıları çaş-baş salır. Marka geyim aldığını düşünən müştərilər isə xeyli miqdarda ziyana düşürlər.
Bəs yaxşı geyim alarkən nələrə diqqət etməliyik?
Brend mağazaların əksəriyyətindən şikayətlər gəldiyini deyən Azad İstehlakçılar Birliyinin sədri Eyyub Hüseynov deyib ki, istehlakçı ilk növbədə aldığı məhsulun məişət sertifikatını tələb etməlidir.
