İtaliyanın sığorta nəhəngi “Generali”nin Almaniyadakı törəmə şirkəti restrukturizasiya proqramı çərçivəsində 2030-cu ilin sonunadək 800 əməkdaşını ixtisar edəcəyini açıqlayıb.
Böyük Britaniyanın nəhəng bankı 5 min nəfəri işdən çıxaracaq - Səbəb süni intellektdir
FED.az xəbər verir ki, bu barədə şirkətin yaydığı məlumatda bildirilir.
Məlumata görə, ixtisar olunacaq əməkdaşların sayı “Generali”nin Almaniyada çalışan 9 min 100 nəfərlik işçi qüvvəsinin təxminən 9 faizini təşkil edir. Şirkət işçi sayının azaldılmasının əsasən könüllü pensiyaya çıxma mexanizmləri vasitəsilə həyata keçiriləcəyini bildirib.
Restrukturizasiya proqramı çərçivəsində əməliyyat xərclərinin optimallaşdırılması da nəzərdə tutulur. Bu məqsədlə hibrid iş modelinin geniş yayılması fonunda şirkətin bəzi ofisləri birləşdiriləcək və daşınmaz əmlakla bağlı xərclər azaldılacaq.
Bununla yanaşı, “Generali” texnoloji transformasiya prosesini sürətləndirməyi planlaşdırır.
Şirkət texnologiya və süni intellekt sahələrinə 100 milyon avrodan artıq investisiya yatıracağını açıqlayıb.
Beləliklə, “Generali”nin restrukturizasiya proqramı həm əməkdaşların sayının azaldılmasını, həm də əməliyyatların rəqəmsallaşdırılmasını və süni intellekt texnologiyalarına investisiyaların artırılmasını əhatə edir.
