Aqrar Sığorta Fondu Azərbaycanda kənd təsərrüfatı təyinatlı ərazilərin sığortalanmış hissəsini hazırki 25 %-dən 31 %-ə çatdırmağı planlaşdırır.
"Kənd təsərrüfatı təyinatlı ərazilərin 25 faizi sığorta təminatına alınıb"
FED.az xəbər verir ki, bunu Fondun İdarə Heyətinin sədri Fuad Sadıqov Bakıda keçirilən Azərbaycan Beynəlxalq Sığorta Forumunda ("Azerbaijan International Insurance Forum" - AIIF-2024) bildirib.
“Son 3 ildə ölkədə kənd təsərrüfatı sığortası dinamik inkişaf edib. Aqrar sığorta fırtına, qasırğa, quraqlıq kimi müxtəlif riskləri əhatə edir, ərzaq təchizatında mühüm rol oynayır. Biz iqlim dəyişikliyinin təsirinə həssas olan əlavə kənd təsərrüfatı ərazilərini sığortalamayı planlaşdırırıq. Bu təşəbbüslər quraqlıq kimi risklərin mənfi nəticələrini azaltmaqla fermerlər üçün hərtərəfli müdafiə təmin etməyi hədəfləyir", - deyə o qeyd edib.
F.Sadıqovun sözlərinə görə, iqlim dəyişikliyi kənd təsərrüfatına ciddi təsir göstərir, təbii fəlakətlərin tezliyi və şiddəti artır: "Buna cavab olaraq, Fond riskləri azaltmaq üçün müxtəlif layihələr üzərində fəal işləyir. Xüsusi diqqət çoxillik bitkilərə yönəlib, çünki onlar xüsusilə həssasdır. İqlim dəyişikliyi nəticəsində yer üzünün 35 %-dən çoxu quraqlıqla üzləşə bilər. Bu şəraitdə fermerlərin kənd təsərrüfatı sığortası kimi təşəbbüslərlə dəstəklənməsi zəruridir. Dünya Bankının məlumatına görə, son 40 ildə təbii fəlakətlərin sayı 400 % artıb. Əgər 1980-ci illərdə illik təxminən 250 təbii hadisə baş verirdisə, 2020-ci ildə bu rəqəm təxminən 900 olub ki, bu da kənd təsərrüfatı məhsuldarlığında böyük itkilərə səbəb olub. Hazırda kənd təsərrüfatı sığortası xidmətləri ölkənin əkin sahələrinin 96%-ni əhatə edir və fermerlərə mühüm maliyyə müdafiəsi təmin edir. Bundan əlavə, sığorta ödənişlərinin 52 %-ni hökumət subsidiyalaşdırır və bu, sığorta öhdəliklərini dövlətin təmin etdiyini göstərir”. (Report)
