Azərbaycanın həyat sığortası bazarının aparıcı şirkətlərindən olan “Xalq Həyat Sığorta” Şirkətinin İdarə Heyətinə yeni sədr təyin edilib.
FED.az xəbər verir ki, bu vəzifəyə ölkənin maliyyə sektorunda kifayət qədər tanınan, sahəsinin peşəkarı olan Orxan Əfəndiyev təyin edilib.
O.Əfəndiyev 2005-ci ildə Bakı Dövlət Universitetinin tətbiqi riyaziyyat və kibernetika fakultəsinə yüksək balla qəbul olaraq Prezident təqaüdçüsü olub. Bakalavr təhsilini 2009-cu ildə fərqlənmə ilə bitirən O.Əfəndiyev daha sonra təhsilini davam etdirərək 2010-2012-ci illərdə Bakı Dövlət Universitetində magistraturanı fəqrlənmə ilə başa vuraraq ehtimal nəzəriyyəsi və riyazi statistika ixtisasına yiyələnib.
O.Əfəndiyev maliyyə sahəsində, o cümlədən sığorta sektorunda 17 ildən çox zəngin və peşəkar iş təcrübəsinə malikdir. O, ölkənin tanınmış və aparıcı sığorta şirkətlərində rəhbər vəzifələrində çalışıb. Həmçinin çalışdığı müddətdə bir çox yerli və beynəlxalq peşəkar təlimlərin iştirakçısı və qalibi olub.
İlk peşəkar iş fəaliyyətinə 2008-ci ildə “A-Group” sığorta şirkətində aktuar kimi başlayan O.Əfəndiyev daha sonra fəaliyyətini “Azərbaycan Sənaye Sığorta” şirkətində məsul aktuar kimi davam etdirib.
Bilik və bacarıqları nəticəsində O.Əfəndiyev daha məsul vəzifəyə təyinat alır. Bu dəfə O, “Günay Sığorta” şirkətində İdarə Heyətinin sədr müavini olur. Bir müddət fəaliyyətini “A-Group” sığorta şirkətində İdarə Heyətinin sədr müavini kimi davam etdirir. Daha sonra, 2019-cu ildən 2024-cü ilə kimi O.Əfəndiyev “Azərbaycan Sənaye Sığorta” şirkətinin İdarə Heyətinin sədri vəzifəsində çalışıb.
Xatırladaq ki, “Xalq Həyat” Sığorta Şirkəti ASC-yə 15 mart 2019-cu il tarixində fəaliyyətinin həyata keçirilməsinə dair 5 illik lisenziya verilib. Həyat sığortası sahəsində həm icbari həm də könüllü sığorta növü üzrə məhsullar təklif edən şirkət 15 milyon manat nizamnamə kapitalına malikdir. Azərbaycan sığorta bazarında müştəri yönümlü bir şirkət kimi tanınan “Xalq Həyat” Azərbaycan Respublikasının İpoteka və Kredit Zəmanət Fondu, “Azərbaycan Sığortaçılar Assosiasiyası” və “İcbari Sığorta Bürosu”nun aktiv üzvlərindəndir.
Müəllif: Elnur Hüseynquluyev
Direktor və baş redaktor
