Fransanın “AXA” Sığorta Qrupunun Azərbaycandakı törəməsi “AXA MBASK” sığorta şirkəti bazar dəyəri ilə müqayisədə çox aşağı qiymətə, belə demək mümkünsə, “su qiymətinə” satılacaq.
Bu barədə maliyyə bazarındakı mənbə bildirib.
Onun sözlərinə görə, fransızlar Azərbaycanın sığorta bazarını tərk etməkdə maraqlı olmasalar da, sonda şirkəti satmaq barədə təkliflə razılaşıblar. Yekun qərar ötən gün axşam saatlarında Maliyyə Bazarlarına Nəzarət Palatasında keçirilmiş görüşdən sonra qəbul edilib. Bundan sonra xarici investorla “AXA MBASK”ın yeni sahibi Elxan Qəribli arasında ilkin razılaşma imzalanıb.
Beləliklə, “AXA”nın Azərbaycandakı 8 illik fəaliyyəti son çatmaq üzrədir. Xatırladaq ki, xarici Sığorta Qrupu yerli bazara 2010-cu ilin oktyabr ayında, özünün törəmə cəmiyyəti -“AXA Seguros Generales, S.A., De Seguros Y Reaseguros” (İspaniya) şirkəti vasitəsilə Azərbaycanın “MBASK” sığorta şirkətinin səhmlərini əldə etməklə daxil olub. Həmin vaxt “MBASK”ın səhmlərinin 70%-i Eldar Qəribova (“Unibank”ın əsas səhmdarı, Müşahidə Şurasının sədri, Elxan Qəriblinin əmisi oğlu), 30%-i isə Avropa Yenidənqurma və İnkişaf Bankına məxsus idi. Sövdələşmədən sonra “AXA” “MBASK”da 51%, E.Qəribov isə 49% paya malik oldu və şirkətin rebrendinqi (“AXA MBASK”) həyata keçirildi. Tədricən isə “AXA” payını 100%-ə çatdırdı.
Eləcə də bax: «AXA» Azərbaycandan niyə gedir? – TƏFƏRRÜATLAR
“AXA MBASK” Azərbaycanda mənfəətlə işləyən sığorta şirkətlərindən olub. 2017-ci ilin maliyyə nəticələri məlum olmasa da, 2016-cı ilin yekununda şirkətin gəlirləri 25,761 milyon manat (2015-ci ilə nisbətən 2,6% çox), xərcləri 25,256 milyon manat (1,8% çox), maliyyə
mənfəəti 505 min manat (66,8% çox), mənfəət vergisi ödəmələri 101 min manat, xalis mənfəəti isə 404 min manat təşkil edib.
1 yanvar 2017-ci il tarixinə “AXA MBASK”ın aktivləri 38,291 milyon manat təşkil edib ki, bu da illik müqayisədə 8,4% çoxdur. Hesabat tarixinə sığorta şirkəti 18,312 milyon manatlıq öhdəliklərə (14,2% çox), 19,98 milyon manatlıq balansk kapitalına (3,6% çox) malik olub.
