Azərbaycan sığorta bazarının iştirakçılarından olan “GünaySığorta” şirkətinin yığımları son bir il ərzində kəskin azalıb. Artıq bir müddətdir ki, şirkətdə yığımların azalması tendensiyası davam edir.
FED.az Azərbaycan Mərkəzi Bankının (AMB) 2022-ci ilin yanvar-oktyabr ayları üzrə açıqladığı hesabatına istinadən xəbər verir ki, şirkət tərəfindən bu ilin 10 ayında 6,402 mln. manat həcmində sığorta haqqı toplanılıb ki, bu da ötən ilin analoji dövrünün göstəricisi ilə müqayisədə 2,249 mln. manat və ya 26% azdır.
Hesabat dövründə baş vermiş sığorta hadisələri üzrə ödənilən vəsaitlərin həcmində artım müşahidə olunub. Qeyd olunan dövrlə müqayisədə sığorta ödənişləri 0,013 mln. manat və ya 0,4% artaraq 3,414 mln. manata çatıb.
Qeyd edək ki, bu yaxınlarda şirkətin rəhbər heyətində istefalar olub. Belə ki, Şirkətin İdarə Heyətinin sədri Mahir Niftəliyev və Direktorlar Şurası sədrinin müşaviri Azad Cavadov öz xahişi ilə vəzifələrindən uzaqlaşıb.
