Azərbaycanda kənd təsərrüfatına yararlı torpaqlardan istifadə edən fiziki şəxslərin ailə üzvlərinin hər biri üçün məcburi dövlət sosial sığorta haqqının, torpağın sahəsindən asılı olaraq, minimum aylıq əmək haqqının müxtəlif dərəcələrində hesablanması nəzərdə tutulur.
Eləcə də bax: Aqrar sahəyə verilən mikrokreditlərin ödəmə müddəti artırıldı - KORONAVİRUSA GÖRƏ
FED.az xəbər verir ki, bu barədə İqtisadiyyat Nazirliyinin hazırladığı Pandemiyadan zərər çəkmiş sahələrdə fəaliyyət göstərən sahibkarlıq subyektlərinə (o cümlədən, kiçik və orta sahibkarlığa) vergi güzəştləri və tətilləri mexanizmində bildirilir.
Sosial sığorta qanunvericiliyinə təklif edilən dəyişikliklərə əsasən, fiziki şəxslər, torpaq sahəsi 5 hektara qədər olduqda minimum maaşın 2%-i qədər, 5 hektardan 10 hektara qədər olduqda 6%-i qədər, 10 hektardan çox olduqda isə 10%-i qədər sosial vergi ödəyəcəklər.
Habelə torpaq mülkiyyətçiləri tərəfindən sosial sığorta hesabatının verilməsinin sabit qəbzlə əvəzlənməsi də nəzərdə tutulur.
Qeyd edək ki, mövcud qanunvericilikdə mülkiyyətində olan kənd təsərrüfatına yararlı torpaqları istifadə edən fiziki şəxslərin torpaq sahəsinin az və ya çox olmasından asılı olmayaraq, sabit olaraq hər bir əmək qabiliyyətli ailə üzvünə görə minimum əməkhaqqının 6%-i miqdarında baza sosial sığorta haqqı nəzərdə tutulur. Minimum aylıq əməkhaqqı məbləğinin 250 manata qədər artırıldığını nəzərə alsaq, 5 hektara qədər torpaq sahəsi və 4 nəfər ailə üzvü olan kənd təsərrüfatına yararlı torpaqları istifadə edən fiziki şəxslər aylıq 60 manat məbləğində məcburi dövlət sosial sığorta haqqı ödəməlidir.
