Bu ilin yanvar-oktyabr aylarında Azərbaycanda həyat sığortası növlərinin hesabına 259,239 milyon manat sığorta haqqı toplanılıb.
FED.az xəbər verir ki, Azərbaycan Mərkəzi Bankının statistikasına görə, bu, ötən ilin yanvar-oktyabr ayları ilə müqayisədə 16% çoxdur.
Eləcə də bax: Sığorta ödənişlərinin dinamikası üzrə - ŞİRKƏTLƏRİN RENKİNQİ (YANVAR-OKTYABR 2020)
Son 1 ildə qeyri-həyat sığortası növlərinin hesabına daxilolmalar isə 369 milyon 135 min manat təşkil edib. Bu isə illik müqayisədə 6,4% çoxdur.
Hesabat dövründə həyat sığortası növləri üzrə ödənişlər 2,4 dəfə artaraq 218 milyon 91 min manata çatıb, qeyri-həyat sığortası növləri üzrə ödənişlər isə 1,7% azalaraq 131 milyon 945 min manata düşüb.
Beləliklə, 2020-ci ilin yanvar-oktyabr aylarında həyat sığortası bazarında toplanmış hər 100 manat sığorta haqqının 84,1 manatı, qeyri-həyat sığortası bazarında toplanmış hər 100 manat sığorta haqqının isə 35,75 manatı müştərilərə geri ödənilib. Bu rəqəmlər 2019-cu ilin yanvar-oktyabr aylarında müvafiq olaraq 40,8 manat və 38,7 manat olub.
Könüllü sığorta 12%, icbari sığorta isə 5% artıb
Bu ilin yanvar-oktyabr aylarında Azərbaycanda könüllü sığorta növlərinin hesabına 435 milyon 222 min manat sığorta haqqı toplanılıb. Bu, ötən ilin eyni dövrü ilə müqayisədə 12,45% çoxdur.
Son 1 ildə icbari sığorta növləri hesabına daxilolmaların məbləği isə 5,3% artaraq 193 milyon 152 min manat olub.
Hesabat dövründə könüllü sığorta növləri isə ödənişlərin məbləği 293 milyon 939 min manat təşkil edib ki, bu da illik müqayisədə 84,1% çoxdur. İl ərzində icbari sığorta növləri üzrə ödənişlərin məbləği isə 14,9% azalaraq 56 milyon 96 min manata düşüb.
Beləliklə, 2020-ci ilin yanvar-oktyabr aylarında könüllü sığorta bazarından toplanmış hər 100 manat sığorta haqqının 67,5 manatı qədər ödəniş edilib. Bu rəqəm 2019-cu ilin yanvar-oktyabr aylarında 41,25 manat olub. İl ərzində icbari sığorta bazarında hər 100 manat sığorta haqqına düşən ödənişin məbləği isə 35,9 manatdan 29,05 manata düşüb. (Renkinq)
