Azərbaycanda 2025-ci ilin ilk on bir ayının statistikası bəzi sığorta növlərinin şirkətlər üçün olduqca yüksək gəlirliliyə malik olduğunu və toplanan vəsaitlərin cüzi bir hissəsinin ödənişlərə yönəldildiyini göstərir.

• Sığorta haqqları toplanan, ancaq ödəniş edilməyən - SIĞORTA NÖVLƏRİ

FED.az Mərkəzi Bankın hesabatına istinadən xəbər verir ki, 12 sığorta növü üzrə ödənişlərin yığımlara nisbəti (zərərlilik göstəricisi) 10%-dən aşağı olub. Bu o deməkdir ki, sığorta şirkətləri bu sahələrdə yığdıqları hər 100 manatın 90 manatdan çoxunu birbaşa mənfəət kimi saxlaya biliblər.

Ən aşağı zərərlilik göstəricisi ümumi mülki məsuliyyətin könüllü sığortasında qeydə alınıb. Belə ki, 10 milyon 911 min manat yığıma qarşı cəmi 61 min manat ödəniş edilib ki, bu da cəmi 0,6% zərərlilik deməkdir. Eyni zamanda, peşə məsuliyyəti sığortası (1 milyon 962 min manat yığıma qarşı 13 min manat ödənişlə 0,7% zərərlilik) və avtonəqliyyat sahiblərinin könüllü məsuliyyət sığortası (4 milyon 969 min manat yığıma qarşı 36 min manat ödənişlə 0,7% zərərlilik) da şirkətlər üçün ən gəlirli sahələr sırasındadır.

Siyahıda həmçinin iri həcmli icbari sığorta növləri də yer alıb. Məsələn, daşınmaz əmlakın icbari sığortası üzrə 73 milyon 867 min manat yığıma qarşı cəmi 2 milyon 326 min manat ödəniş edilib ki, bu da cəmi 3,1%-lik zərərlilik deməkdir. Eyni şəkildə, istehsalatda bədbəxt hadisələrin icbari sığortası üzrə yığılan 90 milyon 657 min manatın cəmi 6,1%-i (5 milyon 542 min manat) ödənişlərə yönəldilib.