Bu, qida məhsullarının istehsal proseslərinin təhlükəsizliyini və keyfiyyətini təsdiq edən sertifkatdır
“Ulduz” Şokolad Fabriki qida məhsullarının istehsal proseslərinin təhlükəsizliyini və keyfiyyətini təsdiq edən beynəlxalq “IFS Management” təşkilatının “IFS Food” sertifikatına layiq görülüb.
“IFC Qida Təhlükəsizliyi Keyfiyyəti Standartı” müəssisələrdə məhsulların istehsalı, qablaşdırılması, daşınması, saxlanması və s. mərhələlərin canlılara zərər verməməsini təmin etmək üçün şərtləri əhatə edir. Bu standart Almaniya Pərakəndə Satıcılar Assosiasiyası və Fransa Pərakəndə Satıcılar Assosiasiyası əmtəə nişanları üçün keyfiyyət sertifikatıdır.
“Ulduz” Şokolad Fabrikinin rəhbəri Nüsrət Məlikov: “Bu sertifikat yerli istehlakçılarımızı məhsullarımızın keyfiyyətinə bir daha əmin etməklə yanaşı, “Made in Azerbaijan” brendi kimi ixrac potensialımızı artırmağa, məhsullarımızı xüsusil ilə Avropa bazarına çıxarmağa kömək edəcək. Hazırda mövcud olan “IFS Food”, “BRC”, “ISO 9001”, “ISO 22 000” və “Halal” sertifikatlarımızla kifayətlənmir, məhsul və proseslərimizi beynəlxalq standartlara uyğun təkmilləşdirməyə davam edirik”.
Veysəloğlu Şirkətlər Qrupuna daxil olan “Ulduz” şokolad fabrikinin istehsal etdiyi məhsullar Rusiya, Ukrayna, Belarus, Gürcüstan, Litva, Estoniya, Qırğızıstan, Özbəkistan, Türkmənistan, Tacikistan, Yəmən, Malayziya, Birləşmiş Ərəb Əmirlikləri daxil olmaqla, 20-dən artıq ölkəyə ixrac olunur. Bir neçə istehsal xətti ilə fəaliyyət göstərən fabrik ən müasir standartlara cavab verən, ekoloji və gigiyenik baxımdan təmiz və təhlükəsiz şokoladlar, karamellər, draje məhsulları, vafli istehsal edir. Fabrikdə şokolad Almaniya, Belçika və İtaliyada istehsal olunmuş ən müasir texnikadan istifadə edilərək hazırlanır.
