Xəbər verdiyimiz kimi, “4MAPS Bilgi Teknolojileri” MMC-yə Sumqayıt Kimya Sənaye Parkının rezidentlik statusu verilib. Məlumata görə, “4MAPS Bilgi Teknolojileri” MMC Sumqayıt Kimya Sənaye Parkının 1,5 ha ərazisində “Tədqiqat-inkişaf mərkəzinin təşkili, kartoqrafiya və naviqasiya xidmətləri” layihəsini həyata keçirəcək.
FED.az xəbər verir ki, investisiya dəyəri 10 milyon manat olan müəssisədə ilk mərhələdə 750 iş yerinin yaradılması nəzərdə tutulur.
“Bizim şirkət xəritəçəkmə və naviqasiya xidmətləri platforması “HERE”ın və “Apple”ın tərəfdaşıdır. Həmçinin “Yandex” şirkətinin Azərbaycan üzrə məlumat təchizatçısıyıq. “Yandex Map” xəritəsi üzrə məlumatları biz toplayıb göndəririk. Şərqi Avropa, Gürcüstan, Müstəqil Dövlətlər Birliyi, Orta Asia ölkləri üçün xəritlərin formalaşdırılması mərkəzini (prosesinq mərkəzini) Azərbaycanda qurmağı nəzərdə tuturuq”.
Abdullah Demirtaş qeyd edib ki, Azərbaycanda Hindistan modelinin tətbiqi hədəflənir. Belə ki, xarici şirkətlər öz informasiya texnologiyaları, o cümlədən məlumatların toplanması, emalı, proqramlaşdırma üzrə bir çox işlərini Hindistanda həyata keçirirlər:
“Əsas fəaliyyətimiz coğrafi (xəritə) məlumatların toplanılması, formalaşdırılması, 3D və 4D xəritələri hazırlanması xidmətləri olsa da, araşdırma – inkişaf mərkəzinin daxilində proqram məhsulları, oyunlar, “metaverse” tətbiqlərinin hazırlanması üzrə də xidmətlər göstərməyi nəzərdə tuturuq.
Hinditanda işçi qüvvəsi ucuz olduğundan xarici şirkətlər məhsulların formalaşdırılması, rəqəmsallaşdırma üzrə işləri bu ölkədə gördürürlər. Azərbaycanın daxil olduğu coğrafiyada proqramlaşdırma, dəstək, rəqəmsallaşdırma, çağrı mərkəzi xidmətləri üzrə xidmətlər göstərən mərkəz yoxdur. Biz də Azərbaycanı Hindistana bənzər rəqəmsal məhsulların formalaşdırılması və satışı mərkəzinə çevirməyi qarşımıza məqsəd qoymuşuq. Bu mərkəzi “Azərbaycanın Silikon Vadisi” kimi də başa düşmək olar. İlk hədəf 750 iş yeri açmaqdır, növbəti mərhələdə işçilərin sayını 1500-ə çatdırmağı planlaşdırırıq”.
“4Maps İnformasiya Texnologiyaları” şirkəti İqtisadiyyat Nazirliyi yanında Əmlak Məsələləri Dövlət Xidmətilə əməkdaşlıq edir. Şirkət təmannasız Qarabağ Xəritə Məlumatlarının “HERE” xəritə məlumatlarına inteqrasiyası üzrə işlər görür. İşlər iyun ayında başa çatacaq.
Abdullah Demirtaş bildirib ki, iqtisadi sabitliyi və təşviqləri Azərbaycanı sərmayələr üçün cəlbedici edir: “Tərəfdaşlarımız Sovetlər Birliyinin tərkibində olmuş bir ölkədə şirkət qurulmasını istəyirdilər. Mən də həmin şirkəti qardaş Azərbaycanda qurdum. Azərbaycanda iqtisadi sabitlik mövcudur, həmçinin sənaye parklarında yaradılan şirkətlərə, vergi və gömrük güzəştləri təqdim edilir. Bu səbəbdən də Azərbaycanda şirkətimiz Sumqayıt Kimya Sənaye Parkının ərazisində fəaliyyət göstərəcəkdir”.
İş adamı əlavə etdi ki, layihənin təməli qoyulduqdan sonra 18-22 ay müddətində başa çatdırılması və istifadəyə verilməsi nəzərdə tutulur. (Marja)
