Azərbaycan Prezidenti İlham Əliyevin Özbəkistana səfəri çərçivəsində avqustun 23-də Daşkənddə Azərbaycan Prezidenti İlham Əliyevin və Özbəkistan Prezidenti Şavkat Mirziyoyevin ilə hər iki ölkənin işgüzar dairələrinin nümayəndələri ilə görüşü keçirilib.
Azərbaycan şirkəti Daşkənddə 133 milyon dollara yaşayış kompleksləri tikəcək
FED.az xəbər verir ki, görüşdən sonra Özbəkistan-Azərbaycan birgə layihələrinə start verilib. Start verilən 7 layihədən biri də Qaşqadərya vilayətinin Qamaşı rayonunda istehsal gücü gündəlik 350 ton olan gips və gips-karton məmulatları istehsalı zavodunun tikintisidir. Layihənin dəyəri 20 milyon dollardır.
Qeyd edək ki, layihə Azərbaycanın "Mətanət A" şirkəti tərəfindən həyata keçiriləcək.
"Mətanət A" şirkətinin Müşahidə Şurasının sədri Elxan Bəşirov görüşdə çıxış edərək bildirib:
“Şirkətimizin ən son innovativ texnologiyalara əsaslanan zavodları bu gün uğurla fəaliyyət göstərməkdədir. Onların arasında əhəng istehsalı zavodu, lak-boya zavodu, son innovativ alman texnologiyaları ilə tikilmiş gips və gipskarton (alçıpan) zavodu, kalsium karbonat, perlit istehsalı zavodu, quru tikinti qarışıqları, beton əlavələri zavodu, müxtəlif çeşiddə izolyasiya materialları, fasad və divar panelləri istehsalı zavodu, eləcə də zavodun layihələndirilməsi, avadanlıq istehsalı və zavodun açar təhvil verilməsi ilə məşğul olan maşınqayırma zavodunu qeyd etmək istərdim. Qeyd edim ki, bu zavodlarla yanaşı, mineral daş yunu istehsalı zavodunun tikintisi də tam başa çatdırılmışdır. Zavod açılışa şirkətimizdə xammalın çıxarılması və istifadəsi ilə bağlı məsələləri həll etdikdən sonra təqdim ediləcəkdir. Qeyd edim ki, ən son innovativ alman texnologiyaları və nadir ixtiralar əsasında qurulan bu zavod dünyada ilk dəfə olaraq Azərbaycanda tikilib.
Bundan əlavə, Özbəkistanın Qaşkadərya vilayətində gips və gipskarton (alçıpan) məhsullarının istehsalı zavodunun tikintisi də nəzərdə tutulur. Biz öhdəliyimizə uyğun olaraq artıq 50 il müddətinə gips daşının çıxarılması üçün lisenziya almışıq və bu bizə hərrac yolu ilə deyil, birbaşa danışıqlar nəticəsində verilmişdir. Zavodun tikintisi üçün bizə artıq torpaq sahəsi də ayrılıb. Əminəm ki, şirkətimiz bundan sonra da böyük layihələr hazırlayaraq Azərbaycan və qardaş Özbəkistanın iqtisadiyyatına mühüm töhfə verəcək”.
Daha sonra Özbəkistanın Qaşqadərya Vilayətində “Mətanət A Şirkətlər Qrupu”na aid “Gips və Gipskarton (alçıpan) məhsulları istehsalı zavodu”nun təməlatma mərasimi baş tutub.
