“Azəripək” MMC şimal-qərb bölgəsinin iri sənaye müəssisələrindən biridir. Hazırda müəssisədə baramaaçan, boyaq-bəzək, toxucu istehsalatları, burucu və xalça sexləri fəaliyyət göstərir. Bu istehsalatlarda, ümumilikdə, 350 nəfər daimi işçi çalışır.
İlk dəfə olaraq Amazon və eBay üzərindən - Azərbaycanın Milli Kəlağayıları satılıb
"Azəripəy"in ixrac gəlirləri - 28% AZALIB
FED.az xəbər verir ki, "Azəripək”MMC sədrinin müşaviri Teymur Musayev bildirib ki, müəssisənin fəaliyyəti, ilk növbədə, zəruri xammal bazasından asılıdır. 2022-ci ildə respublikanın 40 rayonunda barama yetişdirilib, 341 tona yaxın yaş barama istehsal olunub. Rayonlardan tədarük edilən yaş baramaya görə “Azəripək” MMC tərəfindən kümçülərə 1 milyon 927,3 min manat vəsait ödənilib. Tədarük edilən yaş baramadan müəssisədə 130 ton quru barama istehsal olunub. Baramanın 72 tonu dekabrın sonunadək emala verilib. Ötən il müəssisədə 29 ton xam ipək, 12 ton ipək vata istehsal olunub.
Kümçülərdən tədarük olunan yaş barama müəssisənin xammal şöbəsində çeşidlənib təmizləndikdən sonra baramaaçan istehsalatına göndərilir. Burada istehsal olunan xam ipək daha sonra müəssisənin burucu sexinə daxil olur. Sexin rəisi Rasim Səmədov 1977-ci ildən bu müəssisədə, 1980-ci ildən isə burucu sexində çalışır. Onun sözlərinə görə, sexə daxil olan xam ipək sabunla, yağla, digər vasitələrlə isladılır, yumşaldılır və açılaraq toxucu istehsalatının, xalça sexinin tələbatına uyğun olaraq 3 teldən 100 telədək cütləşdirilib burulur və hazır məhsul şəklində həmin istehsalatlara verilir.
Burulmuş ipək sap sonra müəssisənin toxucu istehsalatına göndərilir. İstehsalat rəisi Abbas İsrafilov bildirib ki, hazırda burada 44 işçi çalışır. İstehsalatda sovetlər dövründə istehsal olunmuş 96 ədəd köhnə dəzgahla yanaşı, Almaniya istehsalı olan 6 ədəd ən müasir toxucu avadanlığı da quraşdırılıb. Bu dəzgahların məhsuldarlığı əvvəlkilərdən bir neçə dəfə çoxdur. Sexdə toxunan ipək parçadan əsasən kəlağayı istehsalında istifadə olunur. İpək parçanın qalan hissəsi isə sifarişə uyğun olaraq doğranır, boyaq-bəzək sexində yuyulub ağardılır və daha sonra satışa göndərilir. Sexdə çalışan işçilərin orta aylıq əməkhaqqı 300-350 manat təşkil edir.
“Azəripək” MMC dövlətə məxsus “Azərbaycan Sənaye Korporasiyası” ASC-yə daxildir. (Azərtac)
