“AzerGold” QSC Azərbaycanda filiz yataqlarının işlənməsinə dair Britaniyanın “Anglo Asian Mining plc” (AAM) qızıl mədən şirkəti ilə əvvəllər bağlanmış Hasilatın Pay Bölgüsü müqaviləsinin (PSA) tərəfi olub.
“AzerGold”un ümumi gəliri 1 milyard 232 milyon manatı ötüb”
FED.az xəbər verir ki, bu barədə AAM-ın məlumatında bildirilir.
“Hasilatın Pay Bölgüsü müqaviləsində edilən düzəlişlərə əsasən, “AzerGold” QSC Ekologiya və Təbii Sərvətlər Nazirliyinin (ETSN) əvəzinə Azərbaycan tərəfindən PSA-nın iştirakçısı olub. “Qızılbulaq”, “Dəmirli” və “Vejnəli” müqavilə sahələrində obyektlərin istifadəsi ilə bağlı da kiçik düzəlişlər edilib”, - məlumatda qeyd edilib.
Şirkətin məlumatında bildirilib ki, Hasilatın Pay Bölgüsü müqaviləsi bağlanan zaman Azərbaycanda hələ dağ-mədən sektorunda işləyən dövlət qurumu yox idi və “AzerGold” QSC daha sonra yaradılıb.
Qeyd edilib ki, PSA-nın bəzi müqavilə sahələrində obyektlərin istifadəsi ilə bağlı bəndə də dəyişikliklər edilib.
“Xüsusilə, “Azerbaijan International Mining Company Limited”in (AIMC, AAM-ın “törəmə şirkəti”) “Qızılbulaq”, “Dəmirli” və “Vejnəli” müqavilə sahələrində mövcud olan bütün mədən işləri, qazma kernləri, maşınlar və digər avadanlıqların bu müqavilə sahələri AIMC-nin sərəncamına verildiyi tarixə istifadəsinə icazənin verildiyi dəyişikliklər edilib”, - məlumatda deyilir.
Dəyişikliklər artıq Milli Məclis tərəfindən ratifikasiya olunub və Azərbaycan Prezidenti İlham Əliyev tərəfindən təsdiq edilib.
“Bu düzəlişlər “Anglo Asian Mining”a əhəmiyyətli dərəcədə fayda verəcək, çünki şirkət indi PSA çərçivəsində kəşfiyyat, işlənmə və mədən layihələrində “AzerGold” ilə işləyəcək. Biz ETSN ilə möhkəm əlaqələr saxlamaqla, “AzerGold”un dəstəyi ilə portfelimizi daha da inkişaf etdirməyi səbirsizliklə gözləyirik”, - “Anglo Asian Mining”in baş direktoru Reza Vəziri bildirib.
Xatırladaq ki, hazırda “Anglo Asian Mining” “Gədəbəy” və “Qoşa” müqavilə sahələrindən qiymətli metal hasil edir. “Gədəbəy” yatağından ilk qızıl hasilatına 2009-cu ildə, gümüş hasilatına 2010-cu ildə başlanılıb. Şirkət 2013-cü ilin sentyabr ayında “Qoşa” müqavilə sahəsinin işlənməsinə başlayıb. Bu il “Vejnəli” və “Gilar” yataqlarından hasilata başlanılması planlaşdırılır.
“Production Sharing Agreement” (PSA) tipli müqavilə 1997-ci il avqust ayının 21-də imzalanıb və bununla 6 yatağın işlənməsi nəzərdə tutulur. Müqavilədə Azərbaycanın payı 51 %, “Anglo Asian Mining PLC” şirkətinin payı 49 % təşkil edir. (Report)
