Azərbaycanda aqroparkların ərazilərində emal müəssisələrin yaradılması planlaşdırılır.
Azərbaycanda güzəşt tətbiq edilən emal avadanlıqlarının sayının artırılması - TƏKLİF OLUNUR
FED.az xəbər verir ki, bunu İqtisadi Zonaların İnkişafı Agentliyinin İdarə Heyətinin sədrinin müavini Zamir Dibirov deyib.
Onun sözlərinə görə, artıq “Yevlax Pilot Aqropark”ın ərazisində emal müəssisənin yaradılması nəzərdə tutulur: “Aqroparkın ərazisi 2 855 hektar təşkil edir. Bu ərazinin 129 hektarında, yəni əkinə yaramayan hissəsinin təyinatını dəyişdirərək emal zonası yaradılacaq. Həmin ərazi lazım olan infrastrukturla (işıq, qaz və su) təmin ediləcək. Bundan sonra investorları bu əraziyə cəlb etmək istəyirik.
“Yevlax Pilot Aqropark”ında prioritetləşdirilmiş məhsulların əkini həyata keçirilir, həmin məhsulları emalı nəzərdə tutulur. Burada əsasən ərzaq və aqrar məhsulların emalı gözlənilir".
Z.Dibirov bildirib ki, meyvəçilik, toxumçuluq, süd məhsulları üzrə də emal müəssisələri yaradıla bilər.
O, vurğulayıb ki, investorlar aqroparkların sahibləri ilə birgə emal müəssisələrinə investisiya yatıra bilərlər.
Z.Dibirov deyib ki, aqroparkların gələcək inkişafı və onların kənd təsərrüfatında lokomotiv rolunu oynaması üçün əsas istiqamətlər müəyyən edilib: “Biz aqroparkların ixtisaslaşmasını istəyirik, ona görə aqroparkların klasterləşdirilməsi nəzərdə tutulur.
Ümumiyyətlə, ölkəmizdə 32 rayon üzrə 51 aqropark yaradılıb. Bu aqroparkların ərazisi 240 min kvadrat təşkil edir. Aqroparklar 2014-2015-ci ildən etibarən ölkə Prezidentinin tapşırığına əsasən ərzaq təhlükəsizliyinin təmin edilməsi, regionlarda işsiziliyin aradan qaldırılması və idxaldan aslılığının azaldılması məqsədilə yaradılıb. Aqroparkların yaradılmasında beynəlxalq mütəxəssislər tərəfindən dəstək göstərilib və onların təcrübələri öyrənilib”.
Xatırladaq, 2021-ci ildə “Yevlax Pilot Aqropark”ın açılışı olub. Aqroparkın 103 milyon manatlıq layihə dəyərinin 74 milyon manatı özəl, 29 milyon manatı dövlət investisiyasıdır. Parkda 2 855 hektar ərazinin 1 147 hektarında 100 ailə-fermer təsərrüfatının yaradılması nəzərdə tutulub. Aqroparkda 500 nəfər daimi, 1 000 nəfər mövsümi işlə təmin ediləcək. (Report)
