“Əvvəllər də demişdik ki, koronavirus mutasiyaya meylli viruslardır. Pandemiya dövründə artıq çoxsaylı mutasiyaların şahidi oluruq”.
Eləcə də bax: Azərbaycanda hələ yeni ştam - AŞKARLANMAYIB
FED.az biznes və maliyyə xəbərləri portalı Apa-ya istinadən xəbər verir ki, bunu Elmi-Tədqiqat Profilaktika İnstitutunun elmi işlər üzrə direktor müavini Akif Qurbanov deyib.
O bildirib ki, son mutant ştamm - "Omicron" yunan əlifbasının 15-ci hərfi ilə adlandırılıb: “Bu ştammın əsas xüsusiyyəti əvvəlki mutant ştamlarla müqayisədə yenə yoluxduruculuq qabiliyyətinin artmasıdır. Hətta “Delta” ştammından daha çox yoluxduruculuğa malikdir. “Delta” ştammı haqqında danışanda deyirdik ki, ikiqat mutasiyaya uğrayıb, həm yoluxduruculuq qabiliyyəti, həm də orqanizmdə COVID-19 virusuna qarşı əmələ gəlmiş anticismlərə bir qədər rezidentlik qazanıb. Həmin xüsusiyyətləri "Omicron" ştammında da görmək olar. Mütəxəssislər bu ştammın xarici zülalında 32 mutasiya aşkar ediblər, yəni 32 mutasiya bu virusa xüsusiyyətlər verib”.
A. Qurbanov qeyd edib ki, yoluxduruculuq qabiliyyətinin yüksək olmasına görə bütün ölkələrdə həyəcan təbili çalınır: “Bu ştamm Cənubi Afrikadan yayılmağa başlayıb. Bir çox ölkə, o cümlədən Avropa ölkələri, ABŞ Cənubi Afrika ölkələrindən gələnlərin girişinə məhdudiyyət qoyub. Buna baxmayaraq, dünən Almaniyada "Omicron" ştammı aşkarlanıb”.
Direktor müavininin sözlərinə görə, yeni ştammın yayılma qabiliyyəti daha çoxdur və tezliklə bütün ölkələrə yayıla bilər: “Əsas narahatedici, təşviş yaradacaq məqam bu virusun daha yoluxucu olmasıdır. Vaksinlərin “Omicron” ştammından nə qədər qoruduğu məsələsinə gəldikdə isə, mütəxəssislər qeyd edirlər ki, mövcud vaksinlər xəstəlik və ölümü azaltmaq üçün əhəmiyyətli olaraq qalır. Bu, yeni mutant olduğu üçün bir çox məsələlər hələ öyrənilir”.
