«Lego» oyuncaqlarına yatırım səhm və qızıla yatırımdan daha sərfəlilidir. FED.az xəbər verir ki, bu barədə Moskva Ali İqtisadi Məktəbinin desenti Viktoriya Dobrınskaya və tələbəsi Yuliya Kişilovanın investisiya alətləri ilə bağlı hazırladıqları hesabatda bildirilir.
Hesabata görə, «Lego» oyuncaqları dəsti qızıl, iri şirkətlərin səhmləri və digər alətlərə edilən yatırımlardan daha çox gəlir gətirir.
Belə ki, 2014-cü ildə $3,99 dollara alınmış «Star Wars Darth Revan» dəsti 2015-ci ildə eBay-da $28,46 dollara satılıb. Beləliklə, bu alətin investisiya gəlirliyi 613% təşkil edib.
Viktoriya Dobrınskaya bildirir ki, araşdırma zamanı yalnız qutusu açılmayan oyuncaq dəstlərinin qiyməti analiz edilib. Araşdırma göstərib ki, digər investisiya alətlərindən fərqli olaraq «Lego»nun qiymətinə maliyyə böhranları təsir etmir və araşdırmaçıların fikrincə, bu oyuncaq dəstlərinə «divnersifikasiya potensialı olan cəlbedici investisiya kimi baxmaq olar».
Bununla yanaşı, «Lego» oyuncaqları dəbdəbə mallarına aiddir və onlara tələbat elastik ola bilər. Dobrınskaya və Kişilova öz araşdırmalarında 1987-ci ildən 2015-ci ilədək satılmış 2300-dən artıq «Lego» dəstini analiz ediblər.
Eləcə də bax: Dəyəri 5 mln. dollar olan Azərbaycan şirkəti dünyanın 10 ən yaxşı startapından biri olub
Tədqiqat göstərib ki, oyuncaqlarının sayı böyük olmayan, 113-ə qədər olan dəstlər ildə 22% gəlir gətirirlər. Bu daha böyük dəstlərin (860 əşyası olanların) gəlirliyindən artıqdır. Səbəbi odur ki, kiçik dəstlər az tirajla buraxıla bilir və bu da onlara tələbatı artırır. Bununla yanaşı, istisnalar da var – 2000 əşyadan artıq olan dəstlərin gəlirliyi yüksəkdir.
Araşdırmada bildirilir ki, məhdud tirajla buraxılan və istehsalı bitdiyinə görə, böyük endirimlə satılan «Lego» dəstlərinin də böyük gəlir potensialı var.
Bununla yanaşı, yeni dəstlər köhnələrdən daha böyük gəlir gətirə bilərlər. Səbəb «Lego»ların populyarlığının artmasıdır.
Hesabatda göstərilir ki, ən yüksək gəliri «Star Wars», «Super Heroes», «Batman», «İndiana Cons» kimi brendlərə həsr edilmiş dəstlər gətirir. Maraqlıdır ki, «Lego»nun yalnız bir mövzudakı dəstləri ucuzlaşıb. Bunlar «Simpsonlar»dır- il ərzində 3,5%.
Hesabatda bildirilir ki, «Lego»ya pul yatırmaq istəyənlər nəqliyyat xərclərinə qənaət etməklə bunu ölkə daxilində almalı, xaricə isə «eBay» vasitəsilə satmalıdırlar. «Bu bazar (yəni «eBay» platforması) Rusiya bazarından qat-qat likviddir» - deyə hesabatda bildirilir.
