Azərbaycan və Türkiyə arasında beynəlxalq daşımalarda istifadə olunan “İcazə” blanklarının gələn il üçün kvotası razılaşdırılıb və müvafiq protokol imzalanıb.
Azərbaycan və Türkiyə arasında vahid keçid sertifikatı kvotası - Artırılıb
FED.az bu barədə Rəqəmsal İnkişaf və Nəqliyyat Nazirliyinə istinadən xəbər verir.
Məlumata görə, Bakıda iki ölkə arasında beynəlxalq avtomobil daşımaları üzrə Qarışıq Komissiyanın növbəti iclası keçirilib. Nazirlik yanında Azərbaycan Yerüstü Nəqliyyat Agentliyinin İdarə Heyətinin sədri Anar Rzayev bildirib ki, Azərbaycan və Türkiyə arasında daşımaların ümumi həcmi, eləcə də region üzrə üçüncü ölkə daşımalarında iki ölkə daşıyıcılarının aktivliyi artıb.
O, vurğulayıb ki, yeni yaranmış reallıqlar fonunda Zəngəzur dəhlizinin açılması ölkələrimiz arasında birbaşa nəqliyyat kommunikasiyalarının genişlənməsi və əməkdaşlığın daha da yüksək səviyyəyə çatdırılması üçün yeni imkanlar yaradacaq. “Orta Dəhlizin cəlbediciliyinin artması nəticəsində Xəzər dənizi limanlarına yük axını əsaslı dərəcədə artıb”, – deyən A.Rzayev qeyd edib ki, mövcud şəraitdə hər iki tərəf daşımaların həyata keçirilməsinə dəstək göstərməli, yük axınlarının böyük hissəsini milli daşıyıcılarımızın daşımasına nail olmalıdır.
Türkiyənin Nəqliyyat və İnfrastruktur Nazirliyinin Nəqliyyat Xidmətləri Tənzimləmə Baş İdarəsinin şöbə müdiri Hasan Boz “e-permit” – “İcazə” blanklarının elektron mübadilə sisteminin təqdimatını edib. O, bildirib ki, rəqəmsal texnologiyaların tətbiqi nəqliyyat əməliyyatlarının sürətlənməsinə şərait yaradacaq.
Tədbirdə qeyd edilib ki, il ərzində avtomobil nəqliyyatı ilə beynəlxalq daşımalar sahəsində qarşıya çıxan məsələlərin bir çoxu işçi qaydada operativ həll edilib.
İclasda Türkiyə və Azərbaycan avtodaşıyıcılarının daşıma proseslərində rastlaşdıqları problemlərin aradan qaldırılması və ölkələrimiz arasında avtomobil daşımalarının inkişafı üçün müvafiq tədbirlərin görülməsi barədə yeni razılıqların əldə olunacağına əminlik ifadə olunub.
