2025-ci ilin yanvar-may ayları ərzində Azərbaycana ümumilikdə 789 milyon 752 min ABŞ dolları dəyərində 42 min 786 ədəd avtomobil idxal olunub.

• Azərbaycanın xarici ticarət dövriyyəsinin müsbət saldosu 4 dəfəyə yaxın azalıb

FED.az bu barədə Dövlət Gömrük Komitəsinə istinadən xəbər verir.

2024-cü ilin yanvar-may ayları ilə müqayisədə ölkəyə idxal olunan avtomobillər sayı 7 min 216 ədəd və ya 20,3%, dəyəri isə  141 milyon 294 min ABŞ dollar və ya 21,8% artıb.

2024-cü ilin yanvar-may ayları ərzində Azərbaycana ümumilikdə 648 milyon 458 min ABŞ dolları dəyərində 35 min 570 ədəd avtomobil idxal olunub.

Hesabat dövründə 1 ədəd avtomobilin orta idxal qiymət 31 min 379 manat olub ki, bu da illik müqayisədə 387 manat  (1%) artım deməkdir.

Ötən ilin müvafiq dövründə bu göstərici 30 min 992 manat idi.

İdxal olunan avtomobillər arasında ən böyük pay minik avtomobillərinin üzərinə düşür. Statistikaya görə, 39 min 9 ədəd minik avtomobili idxal olunub ki, bu da ümumi idxalın təxminən 91%-ni təşkil edir. Bu kateqoriyanın dəyəri 709 milyon 137min ABŞ dollarıdır.

Minik avtomobilləri arasında xüsusi olaraq qeyd edilməli olan bir tendensiya hibrid və elektrik avtomobillərinin artan populyarlığıdır. Cədvəldə bu kateqoriyalar üzrə detallı məlumatlar yer alır:

• Daxili yanma mühərriki ilə yanaşı xarici enerji mənbəyindən doldurulma qabiliyyətinə malik, əsasən elektrik enerjisi ilə hərəkət edən nəqliyyat vasitələri (PHEV): Bu tip avtomobillərdən 7 min 717 ədədi idxal edilib ki, bu da 154 milyon 384 min ABŞ dolları dəyərindədir. 
• Daxili yanma mühərriki ilə yanaşı xarici enerji mənbəyindən doldurulma qabiliyyətinə malik, əsasən daxili yanma mühərriki ilə hərəkət edən nəqliyyat vasitələri (HEV): 10 min 709 ədəd bu tipli avtomobil idxal olunub və onların dəyəri 222 milyon 925 min ABŞ dolları təşkil edir. 
• Yalnız elektrik mühərriklə hərəkət edən nəqliyyat vasitələri (EV): Tamamilə elektrikli avtomobillərin idxalı da diqqət çəkir. 767 ədəd elektrik avtomobili idxal edilib ki, onların dəyəri 25 milyon 762 min ABŞ dollarıdır. 

Minik avtomobillərindən başqa, Azərbaycana müxtəlif növ nəqliyyat vasitələri də idxal olunur:

• Sürücü daxil olmaqla 10 nəfər və ya daha çox adam daşımaq üçün nəzərdə tutulmuş mühərrikli nəqliyyat vasitələri: Bu kateqoriyaya daxil olan 210 ədəd avtomobil idxal edilib ki, bu da 16 milyon 236 min ABŞ dolları dəyərindədir. 
• Yük daşımaq üçün mühərrikli nəqliyyat vasitələri: 3 min 337 ədəd yük avtomobili idxal olunub və onların dəyəri 41 milyon 405 min ABŞ dollarıdır.
• Xüsusi təyinatlı mühərrikli nəqliyyat vasitələri: 230 ədəd xüsusi təyinatlı avtomobil idxal edilib ki, bu da 22 milyon 973 min ABŞ dolları dəyərindədir. Bu kateqoriyaya təcili yardım, yanğınsöndürmə və digər xüsusi təyinatlı maşınlar daxildir.