"Rusiyada 1998-ci ilin defoltu təkrarlanmayacaq, o vaxt dövlət indikindən daha az qorunurdu".
Eləcə də bax: Rusiya defolta düşmədi - BORCUNU XARİCİ VALYUTADA ÖDƏDİ
FED.az xəbər verir ki, bunu müsahibəsində Rusiya Təhlükəsizlik Şurasının sədr müavini Dmitri Medvedev bildirib.
“Eyni suya iki dəfə girə bilməzsiniz. Mənim 1998-ci ildə hakimiyyətlə heç bir işim olmayıb. Həmin vaxt bizim cəmiyyətimiz, dövlətimiz daha az qorunurdu”, - Medvedev Rusiyada 1998-ci il defoltunun təkrarlanmasının mümkünlüyü ilə bağlı sualı cavablandırarkən deyib.
Medvedev qeyd edib ki, o vaxt hamı “ABŞ-da maliyyə köpüyünün yaranması ilə bağlı” beynəlxalq maliyyə böhranına müqavimət göstərirdi.
Onun fikrincə, mövcud vəziyyət Qərb ölkələrinin Rusiyaya elan etdiyi və “qaydasız aparmağa” çalışdıqları iqtisadi müharibədir.
“Bu, bazar iqtisadiyyatının ümumi əsaslarının rədd edilməsidir. Burada nə deyə bilərəm: əgər bu onlara baha başa gəlmirsə, bunu etsinlər, amma məlum səbəblərə görə, bu, təbii ki, Rusiyanın simmetrik reaksiyasına səbəb olacaq”, - Medvedev əlavə edib.
Bundan əvvəl maliyyə naziri Anton Siluanov bildirmişdi ki, Mərkəzi Bankın və Rusiya hökumətinin valyuta hesablarının dondurulmasını Qərbin heç bir real iqtisadi əsası olmayan Rusiyanın süni defoltunu təşkil etmək istəyi kimi qiymətləndirmək olar. O izah edib ki, Rusiyanın öhdəliklərini yerinə yetirmək üçün lazımi miqdarda vəsaiti var.
Martın 11-də Rusiya prezidentinin mətbuat katibi Dmitri Peskov da Rusiyada süni defolt şəraitinin yaradılmasından danışıb. O, əmin edib ki, hazırda ölkədə defolt üçün heç bir şərait yoxdur. (Marja)
