2017-ci ildə Azərbaycan vətəndaşları tərəfindən qeyri-rezidentlərə 971,4 mln. dollar məbləğində nəqliyyat xidmətləri göstərilib ki, bu da 2016-cı ilin göstəricisindən 11,4% azdır. Bu barədə Mərkəzi Bankdan məlumat verilib.

2017-ci ilin tədiyə balansına dair məlumata əsasən, hesabat dövründə qeyri-rezidentlər tərəfindən Azərbaycan rezidentlərinə  1 mlrd. 48,4 mln. dollar məbləğində (artım 14,1%) nəqliyyat xidmətləri göstərilib.

Azərbaycanın qarşılıqlı xidmətlərinin bütün həcminin 16%-i nəqliyyat xidmətlərinin payına düşüb.

2017-ci ildə qeyri-rezidentlər tərəfindən Azərbaycan rezidentlərinə 35,7 mln. dollar məbləğində tikinti xidmətləri göstərilib ki, bu da 2016-cı illə müqayisədə 3,4 dəfə azdır.

“Ümumilikdə, 2017-ci ildə Azərbaycanın iqtisadi münasibətlərində qarşılıqlı xidmətlərin həcmi 12,8 mlrd. dollar (artım 7,6%) təşkil edib. Bunun 8,1 mlrd. dollar (artım 8%) qeyri-rezidentlər tərəfindən Azərbaycan rezidentlərinə, daha  4,7 mlrd. dolları (artım 6,8%) Azərbaycan şirkətləri və şəxslər tərəfindən qeyri-rezidentlərə göstərilib”, - deyə məlumatda bildirilir.

Beləliklə, hesabat dövründə xidmət kəsiri 3,4 mlrd. dolları (artım 3%) təşkil edib. Kəsirin 92%-i (3,1 mlrd. dolları) neft-qaz sektorunun payına düşüb.